Zëdhënësja e ministrit të jashtëm gjerman, Frank-Walter Steinmeier-it, ka dalë sot në një konferencë të rregullt shtypi, ku ka folur dhe mbi Donald Trump-in.
Sawsan Chebli është shprehur se komentet polemizuese të kandidatit republikan në zgjedhjet presidenciale në SHBA tregojnë se bota duhet të shqetësohet nëse ai zgjidhet president.
Ndryshe kancelares Merkel, e cila ka deklaruar se nuk do t’i komentojë zgjedhjet amerikane, shefi i politikës së jashtme, Steinmeier, nuk tregohet asnjanës në çështjen në fjalë, sepse, me fjalët e zëdhënëses Chebli, ai beson që është e rëndësishme të tërhiqet vëmendja për rrezikun që paraqet Trump-i.
“Ai sigurisht që nuk është asnjanës për këtë çështje, sepse mendon që nëse ndiqni ato çka thotë Trump-i, atëherë duhet të jeni vërtet të shqetësuar për çka mund të bëhet me këtë botë po qe se ai bëhet president,” ka thënë zëdhënësja duke iu referuar ministrit të Jashtëm gjerman.
Trump do të vihej sot në mes të stuhisë mediatike pas asaj që tha në tubimin në Karolinën e Veriut në lidhje me rivalen e tij, Hillary Clinton-in, duke u akuzuar për nxitje të dhunës.
Vetë ai do të reagonte përmes televizionit Fox News, duke thënë se disa gazetarë të paturpshëm ia kishin shtrembëruar fjalët. Ai ka pretenduar se ka dashur t’i nxisë mbështetësit e vet që të votonin në zgjedhjet e ardhshme.
Pavarësisht kuındërshtisë së gjerë ndaj tij, edhe nga radhët e republikanëve, edhe ndërkombëtarisht, duket se Trump-i nuk e ka humbur as toruan, e as entuziazmin. /tesheshi.com/
