Kryediplomatët e Rusisë dhe Turqisë, Lavrov dhe Çavushogllu, pritet të takohen në Beograd

Edhe pse në Paris ka qenë i pamundur një takim mes Putinit dhe Erdoganit, i kërkuar fort nga zyrtarët turq në përpjekje për të zbutur krizën mes Rusisë dhe Turqisë pas rrëzimit të avionit luftarak rus, nuk do të ngjasë mbase kështu me ministrat respektivë të Punëve të Jashtme.

Sergei Lavrov, ministri i Jashtëm rus, deklaroi dje se nuk do ta refuzonte një takim me homologun e tij turk në Beograd. Po të mërkurën, pas një takimi me homologun qipriot në Nikosia, Lavrov e konfirmoi vendimin për t’u takuar me Çavushogllunë në Beograd.

Sipas Lavrovit, ministri i Jashtëm turk kishte këmbëngulur për një takim në Beograd gjatët samitit të OSBE-së. “Do të dëgjojmë se çfarë do të na thotë Çavushogllu,” u shpreh Lavrov.

Në Beograd do të zhvillohet sot e nesër takimi i Këshillit Ministerial të Organizatës për Siguri dhe Bashkëpunim në Europë (OSBE), gjatë punimeve të të cilit pritet të kryhet dhe një bisedë kokë më kokë mes Lavrovit dhe Çavushogllusë. /tesheshi.com/