Kryediplomati kroat Gordan Grliç Radman, i sulmuar ashpër së fundi nga politika serbe për shkak të mbështetjes për Kosovën gjatë një vizite në Prishtinë, tha se BE duhet të angazhohet më shumë në Ballkanin Perëndimor dhe të ketë një qasje strategjike.
Ai theksoi se vendet në rajon duhet të punojnë për transformimin demokratik, të drejtat e njeriut dhe shtetin e së drejtës, ndërsa BE duhet të përmbush premtimet e saj.
“Kjo do të thotë hapja e negociatave të pranimit me Maqedoninë Veriore dhe Shqipërinë, liberalizimi i vizave për Kosovën, Mali i Zi duhet të mbetet i përkushtuar në rrugën evropiane, ndërsa Serbia duhet të përqendrohet në reformat dhe kapërcimin e trashëgimisë së luftës,” tha Grliç Radman.
“Ne duhet të angazhohemi, të investojmë në stabilitetin dhe sigurinë e Ballkanit Perëndimor, sepse këto janë investime në stabilitetin dhe sigurinë e Evropës,” përfundoi ministri i Jashtëm kroat. /tesheshi.com/
