Një kundërshtar i hapur i qëndrimit të Mbretërisë së Bashkuar në BE, Boris Johnson, kryebashkiaku i Londrës, është shfaqur të dielën në ekranin e BBC-së, ku ka ripërsëritur tezat e tij për largimin nga unioni europian.
Britania nuk duhet ta lërë pa shfrytëzuar “mundësinë e artë” për t’i lënë barrërat rregullatore dhe legjislative të imponuara nga Bashkimi Europian, ka thënë Johnson.
“Ne kemi mundësinë e artë për ta hedhur tutje një barrë rregullatore, legjislative, që është thellësisht antidemokratike.”
Boris Johnson do të fliste për tregtinë e lirë me vendet e BE-së, si një prej synimeve që duhej të kishte vendi i tij.
“Unë dua të bëj fushatë për tregti të lirë me BE-në. Kjo është çfarë na duhet dhe çfarë do të marrim. Dua që ne të jemi në gjendje të bëjmë lirisht tregti me atë zonë.”
Ndërsa referendumi në Britani për qëndrim apo dalje nga BE-ja do të zhvillohet më 23 qershor, Boris Johnson është në kundërshti të hapur me kryeministrin Cameron, që nga ana e tij është pro qëndrimit. /tesheshi.com/
