Pas Shkodrës, duket se vatra e re e infektimit në Shqipëri është zhvendosur në Krujë, aty ku 24 orët e fundit janë regjistruar 5 raste, por përfshirë dhe 12 në Kurbin, pra ngjitazi me Krujën. Në total, numri i të infektuarve në 24 orë ka qenë 22, nga 19 të një ditë më parë.
Pra siç po vërehet, vijon ule-ngritja e zakonshme, të cilën autoritetet e konsiderojnë si “situatë nën kontroll”, ku si më pozitiv konsiderohet të shëruarit në avancë.
Dr. Eugena Tomini nga Instituti i Shëndetit Publik, infirmoi:
“Gjatë 24 orëve të fundit janë testuar 233 persona të dyshuar me COVID-19.
Nga rezultatet e testimeve janë konfirmuar 22 raste pozitive me COVID19.
Nga rastet e reja 3 janë në Shkodër, 2 raste në Tiranë. Ndërkohë vijon hetimi epidemiologjik dhe gjurmimi i kontakteve në vatrën e Krujës ku kanë rezultuar pozitivë 5 persona dhe në Kurbin ku kemi 12 raste të reja.
Deri në këto momente janë testuar 5775 raste të dyshuara dhe prej tyre janë të konfirmuar pozitivë me COVID-19, 584 raste.
Gjatë 24 orëve të fundit, 13 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 327.
Aktualisht në vendin tonë janë 231 persona të infektuar aktivë. Përqindja e të shëruarve është më e lartë krahasuar me të infektuarit aktivë dhe kjo tendencë tashmë vazhdon pa luhatje prej më shumë se një jave”. /tesheshi.com/
