Louis van Gaal nuk është më trajneri i “djajve të kuq”, por kjo nuk ishte diçka e papritur. Holandezi duhet t’i ketë dëgjuar me kohë zërat se ai nuk ishte më i dëshiruar në “Old Trafford”. “Barka e shpëtimit”, fitorja në FA Cup të shtunën, duket se nuk ka qenë e tillë, pasi ngjan të ketë marrë ujë gjatë rrugës.
“It’s over!” Kështu do të shprehej holandezi pas ndeshjes së Mançester Junajtedit me Kristëll Pallasin, ndërsa fjalët do të interpretoheshin në këndvështrime të ndryshme.
Van Gaal paguan çmimin që ofron gjithmonë faza kalimtare në një klub, posaçërisht kur atë e lë një trajner i suksesshëm. Historia e futbollit njeh me shumicë raste të tilla, më i fundit nga të cilët është, për shembull, Interi i Milanos, që ende nuk e ka marrë veten që prej largimit fitimtar të Mourinho-s, ndonëse kanë kaluar vite të tëra.
Holandezi fitoi me Mançesterin FA Cup-in, një trofe që mungonte për të kuqtë që prej 12 vitesh, por ky sukses ishte thuajse asgjë para dështimeve të pafundme. Thjesht fare: Mançester Junajtedi nuk e përfundon kampionatin anglez në tre vendet e para që prej largimit të Alex Ferguson-it.
Vetëm vendi i pestë këtë vit në Premier League. Një bilanc katastrofik: 10 humbje, e vetëm 49 gola të shënuar, diçka që nuk ngjiste prej 26 vitesh.
Mes blerjeve të dështuara që vulosën shkarkimin e Van Gaal-it vendin e parë e zë Angel di Maria. I çmuar ndryshe si dështimi më i madh i holandezit, ai nuk rezistoi shumë, për t’u larguar në fillim të sezonit që lamë pas drejt Parisit.
Një tjetër zhgënjim qe Memphis Depay, që nisi të shuhej pa ndriçuar mirë. Duke shtuar gjermanin Bastian Schweinsteiger, që as dihet nga është, e nuk ka lënë gjurmë gjer më tash në asnjë takim. Argjentinasi Marcos Rojos po ashtu nuk ia doli ta përballonte presionin, duke e parë veten gjithnjë e më tepër në stol.
Wayne Rooney, edhe pse jo një blerje e Van Gaal-it, ndihmoi fort në dështimin e holandezit. Kapitenit vështirë t’i ketë mbetur gjë nga shkëlqimi i shkuar, pasi thuajse në asnjë moment nuk shihet si shpëtimtari i skuadrës.
Van Gaal largohet kështu kokulur, për t’i lënë vend me sa duket një tjetër të shkarkuari.
Mourinho pret të emërohet nesër si trajneri i ri i Mançester Junajtedit. Për portugezin nuk do të jetë aspak e lehtë, e për këtë duhet të jetë i sigurt. Aq më tepër që në pjesën tjetër të qytetit do të jetë një njohje e vjetër e tij: rivali Pep Guardiola. /tesheshi.com/
