“Gjylja e madhe plasi”, do të shprehej Kadri Rroshi nën gunën aktoriale të plakut Mere tek filmi “Njeriu me Top”, i ndodhur në një pozicion të ngjashëm dhe teksa i thonin “plasi në Kuçovë” duke qenë në rolin e Parandilit tek “Gjeneral Gramafoni”, i cili donte ta shikonte me sytë e tij katrahurën.
Ka 48 orë që establishmenti politik dhe zyrtarr i shtetit shqiptar është tronditur fuqishëm nga nisja e zbatimit real të Reformës në Drejtësi.
LSI ka shpërthyer në një aksion bombardues artilerie politike ndaj aleatit kryesor qeverisës, ndërsa brenda gjyqësorit aktual që po përjeton orët e fundit, ka ndodhur një lëkundje tektonike e shkallës 7 ballë. Po ç’ka ndodhur realisht?!
Dy ditë më parë, ambasada amerikane në Tiranë merr një vendim për t’i revokuar vizën një prokurori shumë të lartë dhe bashkëshortes së tij, duke e shpjeguar me çështjen e vettingut. Pas kësaj artileria e rëndë e qarqeve pranë PD-së dhe LSI-së sulmojnë egërsisht ambasadorin Donald lu dhe Romana Vllahutin.
Siç mësohet, në të njëjtën kohë, nga Prokuroria e Përgjithshme bëhet gati një fletë-arrest për një zyrtar shumë të lartë të qeverisë që është bërë shënjestra politike e LSI-së.
Por një grup prokurorësh reagojnë duke ngritur zërin dhe duke kërkuar që ky institucion të mos bëhet pjesë e një “grushti shteti” apo loje politike.
Pas bllokimit të këtij akti që mund të kishte tronditur politikën, Edi Rama bën inagurimin e sheshit “Skënderbej” vetëm me Erion Veliajn, ku nuk kishte asnjë përfaqësues të LSI-së.
Kryetari i bashkisë së Tiranës, i përgjigjet zërave nga aleatët e tij që e duan Ilir Metën kryeministër në 2017-n.
“Kryeministër do të jetë Edi Rama”, thotë Veliaj.
Vetë kryeministri, merr Lindën-të shoqen dhe djalin-Zahon dhe niset për fundjavë në Firence.
Në darkë, Lefter Koka, ministri i Mjedisit i LSI-së i cili nuk u zgjodh në asnjë organ drejtues të partisë së tij dhe për të cilin u fol se mund të bashkohet me PS-në, shpërthen ndaj Vangjush Dakos, Saimir Tahirit dhe Partisë Socialiste. “Më mirë të ishte zgjedhur Grida Duma kryetare e bashkisë”, “Policia do të vjedhë zgjedhjet”, “Kanabisi po na nxjerr bojën”, “PS na ka halë në sy”, ishin deklaratat e frikshme të Kokës.
Pak minuta më pas, një media pranë LSI-së shpërndan lajmin se Petrit Vasili, zëvendësi i Ilir Metës, ka udhëzuar deputetët dhe kryebashkiakët e partisë së tij se duhet të bëjnë kujdes pasi policia do t’i fusë në kurth duke iu lënë drogë në makinat e tyre për t’i arrestuar më pas si trafikantë.
Ka qenë e shpejtë përgjigja e Pjerin Ndreut, deputet i PS-së dhe ish-kryetar i LSI-së së Tiranës i cili shkroi një fjali që duket se ishte mjaft e kultivuar për stilin më të thjeshtë që përdor parlamentari socialist në komunikimin publik.
“Se kush i gënjen disa se ta kanë shpirtin me dorë se di! Koka në Stamboll e trupi në Janinë është lajtmotiv që ka shirë sa ka dashur… Shqiptaret janë të zgjuar tashmë e dinë të vlerësojnë…see you soon!”, shkruan Ndreu që duket se ka marrrë udhëzim nga lart për të sshpërndarë këtë frazë që përfshin disa mesazhe.
Por ndërkohë të premten mbrëma në Tiranë, policia kalon në gatishmëri shumë të lartë. Flitet se do të ketë trazira në disa burgje të vendit, duke nisur nga kryeqyteti. Forcat Speciale kalojnë në alarm maksimal.
Ndërsa të dielën në mëngjes, në kulmin e kësaj përplasjeje, Saimir Tahiri, i cili është realisht zyrtari më i lartë në detyrë që drejton vendin, bashkë me një eksponent të rëndësishëm të LSI-së, Spartak Brahon, mbërrijnë për një vizitë në Kosovë.
Shpëtim Idrizi ndërkohë jep një intervistë ku bën të ditur se do të sfidojë Ilir Metën në Kuvend, duke dërguar për votim në seancë plenare ngritjen e komisionit hetimor për masakrat ndaj popullsisë çame, i cili u mbllokua procedurialisht nga Meta por edhe eskponentë të PS-së në Byronë Parlamentare.
Idrizi flet për qëndrim të fortë në koalicion me Edi Ramën dhe se do të ketë rritje në zgjedhjet e 18 qershorit.
I gjithë ky presion i madh po ndodh, ndërkohë që media pranë LSI-së kanë bërë të ditur se Ilir Meta do të kërkojë postin e kryeministrit për zgjedhjet e ardhshme. E tha edhe vetë Ylli Manjani gjatë një interviste me Blendi Fevziun.
Dhe deri sa të mbyllen negociatat me PS-në, furtuna do të jetë e tmerrshme dhe e forte, për ta vënë nën presion Edi Ramën, që pikërisht në kulmin e kësaj zallamahie i ka futur një mendje të lehtë dhe ka marrë Zahon e Lindën për një fundjavë italiane.
Duke ditur se kryeministri si politikan luan me simbolikë, ky mesazh mund të merret se “atij i rri sahati 12” për presionin e LSI-së dhe me këtë performancë i uron “suksese” në jetë mikut-armik Ilir Meta.
Duket se PS-LSI (nuk)po shkojnë qetësisht ndrejt divorcit përfundimtar… /tesheshi.com/
