Kroacia dhe Portugalia ndeshen sonte në takimin e tretë të kësaj të shtune në kuadër të një të tetave të Euro 2016-tës.
Në “Stade Bollaert-Delelis” të Lensit do të ketë një përplasje intriguese, pasi kroatët, spektakolarë gjatë këtij Europiani, ndeshen me Portugalinë, që si mishërim të vetin ka Cristiano Ronaldo-n.
Kroatët përfunduan të parët në grupin D, me 7 pikë, me dy fitore e një barazim. Kroatët arritën ta mundnin Spanjën të martën e 21 qershorit, duke e kthyer tërë vëmendjen e publikut sportiv nga ata.
Më pisk do ta kishte Portugalia në grupin F, ku vetëm barazimi 3-3 me Hungarinë do t’i jepte të drejtën për të kaluar në turin tjetër. 3 pikët e Portugalisë nuk janë fort inkurajuese, duke patur parasysh se portugezët e kanë po ashtu traditë paraqitjen e tillë zhgënjyese në aktivitete të këtij niveli.
Pavarësisht formës së shkëlqyer, kroatët kanë një detyrë të vështirë, pasi duhet të mundin një Portugali që në tre takimet e mëhershme mes tyre ka dalë fituese.
Përballja më e fundit midis tyre, një takim miqësor në vitin 2013, ka përfunduar 1-0 për Portugalinë, me golin e shënuar nga i zakonshmi Ronaldo.
Ylli i Realit të Madridit do të jetë në qendër të vëmendjes. Nëse Portugalia kërkon të marrë fitoren e parë në këtë Europian, e po ashtu të kalojë në çerekfinale, Ronaldo duhet të japë sonte më të mirën e tij. Madje duhet të bëjë një paraqitje shumë më të mirë se ndaj Hungarisë, edhe pse në atë takim shënoi dy gola.
Formacionet e mundshme janë këto:
Portugalia pritet të luajë me këtë formacion: Rui Patricio, Vieirinha, Pepe, Ricardo Carvalho, Eliseu, Joao Mario, William Carvalho, Moutinho, Andre Gomes, Nani, Ronaldo.
Kroacia ka të ngjarë të paraqitet me këtë njëmbëdhjetëshe: Subasic, Srna, Corluka, Vida, Strinic, Modric, Badelj, Brozovic, Rakitic, Perisic, Kalinic. /tesheshi.com/
