Kroacia vendosi të lejojë refugjatët të udhëtojnë në veri të Europës, duke hapur një rrugë të re për ta, pasi Hungaria mbylli kufirin me Serbinë.
Më shumë se 150 emigrantë kaluan në Kroaci nga Serbia. Ata që kanë mbetur të bllokuar në kufirin serb me Hungarinë po ndërmarrin të njëjtin udhëtim.
Kroacia thotë se është e gatshme t’i presë refugjatët ose të shërbejë si tranzit për ku ata dëshirojnë të shkojnë.
Pjesa më e madhe e refugjatëve shpresojnë të arrijnë në Gjermani, por kufizimet në kufi dhe grindja e shteteve europiane për pranimin e tyre ka bërë që të ngrihen ndasi të mëdha, në mes të krizës.
Tashmë që nuk do të pengohen në kufi nga Kroacia, problemi më i madh për këtë rrugë të re të fluksit të refugjatëve, është se kufiri mes Kroacisë dhe Serbisë nuk është akoma i pastër nga minat e mbetura aty prej luftës. Refugjatët rrezikojnë të bien viktimë e këtyre minave të pashpërthyera që nga koha e luftës. Për këtë arsye, autoritetet kroate kanë dërguar ekspertë të minave në zonë.
Ekipi i ekspertëve, raporton Reuters, është dërguar në pjesën lindore të kufirit të Kroacisë, me kërkesë të policisë.
Në Kroaci janë gjashtë rajone, ku kroatët kanë luftuar kundër forcave serbe gjatë shpërbërjes së ish-Jugosllavisë, në të cilat ishin vendosur mina tokësore, një prej të cilave shtrihet përgjatë kufirit të Kroacisë me Hungarinë dhe Serbinë.
Qindra migrantë janë pare të kalojnë në këmbë zonën, por nuk ka asnjë incident për momentin. /tesheshi.com/
