Që nga 1 janari i vitit 2018, neglizhimi i një anëtari të moshuar dhe të pafuqishëm të familjes në Kroaci, do të ndëshkohet me gjobë prej së paku 10,000 kuna ose me burgim për të paktën 45 ditë.
Ky është vendimi më i ri i përfshirë në Ligjin për Mbrojtjen e Familjes, në të cilin për herë të parë përmenden personat e moshuar si grup që gëzon mbrojtje të veçantë. Neglizhenca e tyre në kuptim të mosdhënies ose dhënies në mënyrë jo të rregullt të ushqimit, pijeve dhe ilaçeve, mosndërrimi i pelenave, mosofrimi i kujdesit shëndetësor dhe të ngjashme, që nga 1 janari, do të konsiderohen gjithashtu një formë e dhunës.
Sipas të dhënave të ofruara nga Zyra e Avokatit të Popullit Lore Vidoviç, vetëm rreth 17 përqind e personave të moshës 35-49 vjeçare në Kroaci, ofrojnë çdo ditë një kujdes të tillë për anëtarët e moshuar dhe të pafuqishëm të familjes. Në anën tjetër, në shoqëri po krijohet gjithnjë e më tepër një diskurs i imponimit të një stigme, ku ‘të jesh i moshuar do të thotë të jesh i panevojshëm’, shkruan Glas Slavonija.
“Që nga 1 janari, do të hyjë në fuqi Ligj i ri për Mbrojtjen e Familjes, dhe një risi që kemi propozuar dhe përfshirë në të, do të jetë përkujdesja më e madhe e të rinjve ndaj të moshuarve. Është pikërisht ky grup që u rendit për herë të parë në Ligj, si grup me mbrojtje e veçantë. Risi tjetër është edhe fakti se neglizhimi i nevojave të tyre gjithashtu do të konsiderohet si një formë e dhunës. Këto janë situata që çojnë në shqetësimin e të moshuarve ose fyerjen e dinjitetit të tyre dhe kështu shkaktojnë vuajtjet e tyre, qoftë fizike apo mendore”, thekson Avokati i Popullit.
Në Zyrën e Avokatit të Popullit theksojnë se kujdesi i të moshuarve nuk duhet të mbështetet në sanksionim por në parandalim, prandaj është e rëndësishme që të instalohet një i ashtuquajtur “sistem i kujdesit joformal.
“Është me rëndësi të ofrojmë mbështetje për anëtarët e familjes që kujdesen për të moshuarit në familjet e tyre”, thonë zyrtarët e kësaj zyre./tesheshi.com/
