Pas tre pikave drejtuar qeverisë nga kreu demokrat Basha në lidhje me krizën pas-tërmetore, është dhe presidenti Meta që propozon 4 sosh.
“Pas takimit me pedagogët dhe drejtuesit shkencorë, lidhur me situatën e krijuar pas tërmetit, i kam kërkuar sot qeverisë:
– Fillimin e punës sa më parë, për azhornimin dhe kompletimin e një Harte të re Fizike të Riskut për Shqipërinë në të cilën do të përfshihen dhe saktësohen zonat me rrezik sizmik, si dhe të gjitha territoret e kërcënuara nga erozionet, përmbytjet, rrëshqitjet, zjarrjet, etj;
– Zbatimin e detyrueshëm në të gjithë territorin e vendit të sistemit të eurokodeve në ndërtimet civile dhe objektet e banimit, pa asnjë përjashtim;
– Plotësimin e legjislacionit të planifikimit urban me elementë të rinj sigurie, sipas procedurave bashkëkohore, në projektimin dhe ndërtimin e objekteve të ndërtimit;
– Në kuadër të rishikimit të Buxhetit 2020, për përballimin e pasojave tepër të rënda, duhet të planifikohet edhe mbështetja e domosdoshme financiare për institucionet përkatëse të kërkimit shkencor”, shkruan Meta në një postim Facebook.
Propozimet e kreut të shtetit pasojnë një mbledhje të Këshillit të Sigurisë Kombëtare që ai thirrri një ditë më parë, së cilës shefi i qeverisë, edhe pse në përplasje të natyrës politike me të, iu përgjigj me pjesëmarrje. /tesheshi.com/
