Kreu i PDIU-së, Shpëtim Idrizi ka hedhur sërish një propozim në tregun politik, atë për një pakt kombëtar i cili do i hapë rrugë sipas tij zgjidhjes së çështjes së Vetingut dhe zbatimit tërësor të Reformës në Drejtësi.
“Partia Drejtësi, Integrim dhe Unitet e ka mbështetur pa asnjë lloj kushti Reformën në Drejtësi. I bëj thirrje të gjithë forcave politike shqiptare, boll më me sherre që nuk kanë lidhje me interesin publik. Ka ardhur momenti që të kemi një pakt të madh kombëtar, një pakt kombëtar që të jepet dakortësi për reformën në drejtësi, por edhe për proceset e integrimit që po kalon vendi. Politika shqiptare ka qenë jashtëzakonisht e zonja për të prodhuar kriza, por nuk ka qenë e zonja për t’i zgjidhur këto kriza. I bëjmë thirrje politikës që të zgjidhë urgjentisht problemin e Vetingut, t’i hapim rrugën një reforme shumë të rëndësishme për të gjithë shqiptarët”, tha Idrizi gjatë një takimi mke strukturat e partisë së tij në Sarandë.
Edhe ditë më parë, Idrizi propozoi hapjen e një kapitulli të ri në politikën shqiptare, pra paktin kombëtar, për hir të së ardhmes së vendit. /tesheshi.com/
