Lideri i opozitës shqiptare në Maqedoni, PDSH-së, Menduh Thaçi ka shprehur besimin se pas takimeve me diplomatin gjerman, Johan Hajndëll, dhe ndihmës sekretaren amerikane të shtetit, Victoria Nuland, do të ketë zgjidhje të mundshme për krizën politike.
Thaçi ka thënë se faktori ndërkombëtar duhet të jetë më i rreptë me politikanët, që sipas tij është edhe arsyeja për zvarritjen e krizës në vend.
“Përfaqësuesit ndërkombëtarë që po ndërmjetësojnë zgjidhjen e krizës, duhet të kenë qëndrim më të rreptë dhe të mos tolerojnë kërkesa dhe dëshira të ndryshme të partive politike. Vetëm në këtë mënyrë mund të arrihet zgjidhje dhe t’i jepet fund krizës”, ka deklaruar Thaçi para gazetarëve.
Sot i dërguari special i Gjermanisë, për zgjidhjen e krizës politike në Maqedoni, Johan Hajndëll ka zhvilluar takim me ambasadorin e BE-së në Maqedoni, Aivo Orav.
Në pyetjen e gazetarëve se kur do ishte afati i fundit për të arritur marrëveshje, Orav u përgjigj shkurt duke thënë se afati ka qenë dje, që nënkupton se çdo ditë e humbur për vendin është e dëmshme.
Ndryshe, Hajndëll pritet që gjatë ditës së nesërme të realizojë takim me gjithë liderët e partive më të mëdha politike në Maqedoni. M.Krasniqi – /tesheshi.com/
