Nga Blendi Gashi
Përçarjet e fundit në Vetëvendosje nuk kanë lënë pa prekur edhe aktivistët e burgosur të saj, konkretisht ata të dënuar si të dyshuar për sulmin ndaj objektit të Kuvendit ndodhur gjatë protestave të opozitës dy vjet më parë.
Përveç kryetarit aktual Visar Ymeri, që hapur doli kundër mbledhjes së Këshillit të Përgjitshëm, edhe mbesa e tij, aktivistja Adea Batusha e dënuar nga Gjykata Themelore në Prishtinë me dy vjet burgim, ka reaguar ndaj thirrjes së mbledhjes duke thënë se në situatën e krijuar këto veprime nuk i kontribuojnë zgjidhjes.
Batuasha ka kritikuar edhe ecurinë e mbledhjes duke thënë se partia harroi aktivistët e dënuar.
“Përveç pikave 4 dhe 5 që ishin shpallja e zgjedhjeve dhe diskutimi i koaicioneve lokale në pikën 6 parashihej të miratohet një: Deklaratë për neve, aktivistëve të dënuar me 21 vite burg dhe deputetët e arrestuar. Thënë të drejtën, kjo deklaratë do të ishte veprimi më i mirë i kësaj mbledhjeje të nxituar. Dhe do të më mbetej merak të mos merrja pjesë. Por nuk ndodhi ashtu. Në komunikatën zyrtare të këtij Këshilli në veçse u përshëndetëm. Përderisa për temat për pushtetin brenda Lëvizjes dhe pushtetin në komunat ku fituam apo kemi koalicion u bë debat, per ne nuk pat kohe. Kjo pike iu delegua nje komisioni apo grupi punues sikurse te ishte duke u organizuar ndonjë event per fundvitit”, ka shkruar Batusha.
Ja si VV i kundërpërgjigjet aktivistes së saj…
Pas kësaj deklarate të aktivistes së dënuar Batusha, ka reaguar Vetëvendosje duke thënë se regjimi ka afat deri në muajin shkurt të vitit 2018, më tej nuk do të ketë më kërkesa, por protesta e demonstrate në mbrojtje të aktivistëve.
“Këshilli i Përgjithshëm i bën kërkesë kryetarit, kryesisë dhe Sekretariatit të Përgjithshëm, që të përcjellë me vëmendje kërkesat e familjarëve dhe të avokatëve të aktivistëve të dënuar, duke bërë ç´është e mundur, me të gjitha kapacitetet njerëzore, logjistike e financiare të Lëvizjes, që kjo çështje të avancojë në shkallët më të larta të gjyqësorit. Po ashtu, i bëjmë kërkesë strukturave tona drejtuese që të jenë sa më aktive, në çdo rast, për ta vetëdijësuar publikun e brendshëm dhe për ta ndërkombëtarizuar sa më shumë problemin e dënimit të padrejtë e kriminal të aktivistëve të pafajshëm, si edhe çështjen e hetimit të pavarur për vrasjen e Astrit Deharit” thuhet në reagimin e VV.
Kjo parti më tej thotë se as nuk pajtohet e as nuk do ta lejojë arrogancën e gjyqësorit të kapur ndaj deputetëve tanë, të cilët nuk kanë bërë asnjë krim, por vetëm kanë mbrojtur territorin dhe të ardhmen e Kosovës.
“Në kërkojmë me këmbëngulje që institucionet të reagojnë ashtu siç është e drejta dhe ligji, t´i lirojnë aktivistët dhe deputetët e pafajshëm, dhë të mundësojnë të bëhet drejtësi për rastin e Astrit Deharit. Siç është bërë me dije publikisht, në marshin protestues të datës 5 nëntor 2017, regjimi ka një afat, dhe ai afat është muaji shkurt 2018. Më tej nuk do të ketë më kërkesa, por protesta e demonstrate”, thuhet në reagimin e VV-së.
Si kundërpërgjigje ndaj deklaratës së aktivistes Batusha ka dalë edhe deputeti Liburn Aliu, i cili përmes një postimi në Facebook thotë se Lëvizja nuk do të dorëzohet deri të vihet në vend drejtësia për çka paralajmëron edhe protesta.
Ai thotë se dënimi i aktivistëve dy ditë para zgjedhjeve ishte i porositur politikisht për ta dëmtuar Lëvizjen në Prishtinë, Prizren e Dardanë.
“Tash ne i kemi 15 ditë kohë që të paraqesim ankesë mbi këtë aktvendim. Si Lëvizje, me të gjitha forcat që i kemi, jemi të përgatitur ta ndjekim këtë çështje në të gjitha instancat dhe shkallët e gjyqësorit, bashkë me familjarët dhe avokatët e aktivistëve të dënuar. Ne jemi të bindur se aktivistët janë të pafajshëm, dhe pretendimet e akuzës janë rrëzuar gjatë 15 muajve që po zgjat ky proces gjyqësor i porositur nga pushteti politik. Ne nuk do të dorëzohemi, nuk do të kursehemi, nuk do të ndalemi deri sa të zbatohet drejtësia e të lirohen të pafajshmit, sepse janë shokët tanë të idealit, janë qytetarë të mirë, janë opozitarë që po dënohen nga një pushtet kriminal. Solidarizohemi me ta, e nëse do të jetë nevoja, do të protestojmë për ta. Sepse e duam Kosovën demokratike, e duam shtet të së drejtës. Ku askush nuk dënohet pa prova, e ku opozita nuk shkelet nga pushteti” ka shkryar Aliu. /tesheshi.com/
