Nga Blendi Gashi
Edhe pse janë pjesë e një Kuvendi të dështuar, i cili ende nuk funksionon, deputetët kosovarë e marrin rrogën cent më cent.
Dhe kjo ka detyruar disa OJQ e zëra publikë që atyre t’u ndërpritet paga derisa të nisë puna normalisht, në Kuvend e institucione të tjera që rrjedhin prejk tij.
Nis peticioni online kundër deputetëve…
Inisiativa është lançuar fillimisht nga “PolitiFakte”, me anë të një peticioni
“Në Kosovë, qytetarët jetojnë në kushte të rënda sociale, ekonomike dhe në izolim. Me zgjedhjen e tyre si deputet, secili prej tyre ka marrë obligime që i takojnë një deputeti me Kushtetutë dhe ligje. Duke qenë se ata po dështojnë të kryejnë obligimet e tyre prej deputetëve atëherë më e pakta që mund të presim është që ata të mos paguhen për punën që po dështojnë ta kryejnë”, thuhet në mes tjerash në mes tjerash në peticion.
Po dëmtohet buxheti…
Njohësi i rrethanave politike Faik Krasniqi, thotë se po të kishin pak ndërgjegje, deputetët nuk do të pranonin të merrnin paga për punën që nuk janë duke e bërë.
“Do të duhej të aprovohej një ligj i veçantë në Kuvend që deputetët mos të kenë të drejtë marrjen e pagave dhe mëditjeve derisa të formohen institucionet. Por një gjë e tillë nuk ndodh kurrë, sepse kur vije interesi i tyre personal këta deputetë nuk aprovojnë ndonjë ligj që u ndalon ta vjelin pandershëm buxhetin e shtetit”, thotë Krasniqi për tesheshi.com.
Edhe kryetari i Këshillit për Mbrojtjen e të Drejtave dhe Lirive të Njeriut, Behgjet Shala, kërkon të bëhen ndryshime ligjore në mënyrë që deputetët të mos paguhen për aq kohë sa Kuvendi të jetë jofunksional.
“Është joserioze në qoftë se deputetët e marrin rrogën prej 2000 e më tepër euro dhe të mos jenë në gjendje të kryejnë detyrën nga votuesit, ndaj qytetarit dhe ndaj shtetit nga i cili paguheni. Kjo është një shpërdorim i buxhetit dhe duhet të ndërrohet edhe rregullorja dhe të bëhet ligji që në qoftë se nuk kemi efikasitet atëherë nuk mund të paguhen për një punë që nuk e bëjnë. Kështu që këta fajtor janë të gjithë dhe në qoftë se nuk dalin nga istikamet e barrikaduara në mbrojtje ekskluzivisht të interesave të tyre politike atëherë do të kemi një situatë e cila do të përfundoj me zgjedhje të reja”, ka thënë Shala për mediat kosovare.
Kujtojmë se peticioni i OJQ-së “PolitiFakte” deri më tani është mbështetur nga afër 2 mijë qytetarë.
Linku i peticionit: https://www.change.org/p/administrata-e-kuvendit-te-kosoves-t%C3%AB-mos-paguhen-deputet%C3%ABt-e-kosov%C3%ABs-p%C3%ABr-pun%C3%ABn-q%C3%AB-nuk-po-e-kryejn%C3%AB. /tesheshi.com/
