“Bashkimi Europian dhe tregjet financiare konfiskuan sërish Demokracinë. Ajo që po ndodh në Itali është një grusht shteti, një dhunim i popullit italian nga ana e institucioneve ilegjitime”. Kështu e ka komentuar krizën italiane në një postim në Twitter, liderja e “Frontit Nacional” francez, Marine Le Pen.
“Përballë këtij mohimi të Demokracisë, zemërimi popullor po rritet gjithandej në Europë!”, shkruan ajo.
Dhe nuk është Le Pen e vetmja që mendon kështu. “Mattarella është angazhuar në një grusht shteti institucional, që normalisht është garant i kushtetutës italiane: sot është në shërbim të BE-së dhe Komisionit Europian”, deklaron zëvendës-presidenti i Frontit Nacional,
Nicolas Bay, për mikrofonin e France 2. “Pesë Yjet dhe Lega kanë fituar zgjedhjet parlamentare, kanë arritur në disa javë një marrëveshje të plotë qeverisjeje. Kanë legjitimitetin për ta zbatuar. Mattarella provon të bllokojë procesin, duke provokuar një krizë të madhe politike”, shkruan ai, duke përfunduar se presidenti po imponon pikëvështrimin e tij. /tesheshi.com/
