Presidenti Meta ka përcjellë apelin e radhës për krizën politike, duke tentuar të jetë asnjëanës, edhe pse nga mazhoranca konsiderohet palë me opozitën.
“Mendoj që kjo situatë nuk duhet të ekzistonte kurrsesi pas 22 vjetësh, që kur Shqipëria u nda me vitin 1997, që ishte një vit mjaft fatkeq. Të gjithë t’i thërrasin mendjes dhe të marrin përgjegjësitë e tyre, sepse për interesa tërësisht egoiste dhe okulte, Shqipëria nuk ka pse të shkojë në konfrontim dhe as shqiptarët me njëri-tjetrin. Ata kanë vendosur të bashkëjetojnë në mënyrë demokratike dhe janë ndarë me sistemet përjashtuese që në vitin 1990”, deklaroi presidenti.
Meta nuk pranoi që të konsiderohej palë në këtë krizë, duke thënë se “Askush nuk mund t’i transferojë përgjegjësitë te të tjerët aq më tepër te Presidenti i Republikës. Ata e dinë vetë shumë mirë se çfarë duhet të bëjnë dhe duhet të jenë të ndërgjegjshme për pasojat që do të kenë në rast se do ta çojnë vendin drejt konfrontimit”.
Ndërkohë, sipas shefit të qeverisë, kjo krizë ka vetëm një përgjegjës; opozitën e cila ka dalë nga sistemi e tenton të mbajë peng sistemin. /tesheshi.com/
