Ish-ministri i Jashtëm i Maqedonisë, Denko Malevski në një shkrim të tij autorial me titull “Çfarë të reja sjellin Hajndëll dhe Nulland?”, ka shkruar se pas raportit të Pribes, tanimë gjithë bota i di defektet e sistemit politik të Maqedonisë. Por edhe pas Marrëveshjes së Përzhinos ku edhe u formua Prokuroria Speciale Publike, ai shprehet skeptik se sërish nuk pritet të ndodh diçka e re së shpejti.
Sipas tij, që Maqedonia të dalë sa më shpejtë nga kriza politike që e ka kapluar tanimë një kohë të gjatë, varet nga realizimi që kanë rënë në ujdi palët. Malevski shkruan se deri sa politikanët maqedonas nuk i lënë anash interesat personale dhe partiake para atyre shtetërore, nuk do të ketë zgjidhje të shpejtë të krizës politike.
“Kuptohet, shpejtësia e daljes nga kriza varet nga realizimi i asaj që u morrën vesh, që do të thotë, të përdor një frazë, nga gatishmëria e politikanëve maqedonas që interesat e shtetit t’i vendosin në plan të parë, e jo interesat personale dhe ato të partisë”, ka shkruar Malevski.
Malevski madje në artikullin e tij shkruan se në momentin kur do të largohen faktorët personalë të individëve të involvuar në keqpërdorimin e pushtetit të publikuara në incizimet, të gjithë vepruesit tjerë politik në Maqedoni, të mbështetur nga BE dhe nga SHBA, kanë mundësi të bashkohen rreth principeve të demokracisë së shoqërisë së lirë dhe shtetit juridik dhe të hapin faqe të re për demokratizimin e shoqërisë. M.Krasniqi – /tesheshi.com/
