Mbërritja e një nëndetëseje amerikane në Korenë e Jugut, midis shqetësimit në rritje për një tjetër test bërthamor nga fqinja e saj e Veriut, ka nxitur deklarata se rajoni mund të jetë edhe në prag të një lufte të mundshme. Nëndetësja e pajisur me raketa i bashkohet kështu një grupi luftanijesh të drejtuara nga aeroplanmbajtësja “Carl Vinson”.
Ndërkaq, në Korenë e Veriut shënohet përvjetori i 85-të i ushtrisë. Ka raportime se ky përvjetor mund të shënohet me “stërvitjen më të madhe ndonjëherë”. Peniani mund të planifikojë teste të tjera – edhe në të kaluarën vendi komunist i ka shënuar përvjetorët me teste bërthamore apo lëshime raketash.
Kriza me Korenë e Veriut ka zhvillime në shumë fronte, paralajmërojnë analistët. Mbërritja e një nëndetëseje amerikane në Korenë e Jugut mund të jetë edhe një ngjarje rutinë, mirëpo në këtë kohë të tensionit të shtuar, mund të ketë edhe një domethënie të veçantë.
Peniani mbetet sfidues, duke përfshirë në këtë sfidë edhe Kinën, e duke paralajmëruar se nëse ndihmon Shtetet e Bashkuara, pasojat do të jenë “katastrofike”.
Kjo situatë ka mbledhur me urgjencë përfaqësuesit diplomatikë të Koresë së Jugut, Shteteve të Bashkuara dhe Japonisë në Tokio.
Ajo që pritet të shtohet në këtë shumatore, do të varet nga fakti nëse presidenti amerikan Trump do të refuzojë ose jo këshillat e dhëna nga paraardhësit se të sulmosh Korenë e Veriut, do të thotë të provokosh një sulm mbi Seulin. Madje, një ekspert ka shtuar se mund të ketë me dhjetëra mijë të vdekur që ditën e parë të një përshkallëzimi të tillë.
Mund të ndodhë që presidenti Trump të ketë vendosur që kostoja e goditjes nga ana e Koresë së Veriut me armë bërthamore në Shtetet e Bashkuara, mund të ketë domethënien se duhet marrë në sy rreziku i luftës. Analistët thjesht nuk e dinë se çfarë ka në mendje Trump.
Shtetet e Bashkuara për momentin duken se do të marrin pjesë në stërvitjen ushtarake me grupin e anijeve luftarake “Carl Vinson” të cilat u njoftuan se po niseshin drejt Koresë së Veriut në fillim të këtij muaji, me synim “mbajtjen e gatishmërisë” në rajon.
Në atë kohë, Trump tha se po dërgonte një “armatë” në rajon dhe se Shtetet e Bashkuara kishin nëndetëse që janë “shumë të fuqishme, shumë më të fuqishme sesa aeroplanmbajtësja”.
Peniani reagoi plot zemërim ndaj vendosjes së aeroplanmbajtëses amerikane në rajon, duke kërcënuar ta fundosë atë dhe të nisë një “sulm të paralajmëruar super-të fuqishëm”, kundër atij që e cilësoi agresion amerikan.
Sidoqoftë, anijet luftarake amerikane shkaktuan konfuzion dhe tallje kur u mësua se po lundronin në drejtim të kundërt, larg Koresë së Veriut. Por, zyrtarët amerikane thanë se ata po procedojnë në rajon sipas të gjitha planifikimeve të mëparshme.
Duket se aeroplanmbajtësja “Carl Vinson” së pari, përfundoi një mision të planifikuar stërvitor në Australi.
Kina është aleatja e vetme e Koresë së Veriut në rajon dhe partnerja më e madhe tregtare e saj. Uashingtoni i ka apeluar disa herë Pekinit që të bëjë presion mbi Penianin. Presidenti kinez, Xi Jinping ndërkaq në një bisedë me Trump, apeloi të gjitha palët “të ruajnë vetëpërmbajtjen dhe të shmangin veprimet që mund të rrisin tensionin”.
Në fund, mund të thuhet se gjithë këto veprime nga shtetet e përfshira në rajon duken si një lojë ping-pongu, por rreziku mbetet në rast të ndonjë incidenti që mund të shkaktojë luftë “pa dashje”.
Përgatiti: Juli Prifti – /tesheshi.com/
