Presidenti italian Sergio Mattarella ka thënë se ka pranuar kërkesën e shumë liderëve të partive për të marrë më shumë kohë në përpjekje për të formuar një qeveri të re dhe për të shmangur zgjedhjet e parakohshme.
Sipas AP, Mattarella u tha gazetarëve pas dy ditësh konsultimesh pas rënies së qeverisë aktuale këtë javë, se drejtuesit e partive i kishin thënë atij se kishin nevojë për më shumë kohë dhe se ai prandaj caktoi një raund të ri konsultimesh të martën e ardhshme.
Ai theksoi se qeveria e re do të duhej të ishte aq e fortë sa të fitonte besimin e parlamentit dhe të kishte një axhendë gjithëpërfshirëse.
Një aleancë e mundshme e demokratëve dhe Lëvizjes 5 Yje
Përndryshe, shtoi ai, ai do të duhet të shpërndajë parlamentin, duke i hapur rrugën zgjedhjeve që mund të mbahen qysh në këtë vjeshtë.
Luigi di Maio, drejtuesi i Lëvizjes 5 Yje, anëtar i koalicionit qeverisës deri më tani, tha se ai nuk kishte frikë nga zgjedhjet e parakohshme, por e la derën e hapur për bisedime për formimin e një “aleance të fortë”, domethënë një qeverie të re.
Pasi bisedoi me Mattarellan, ai tregoi se ekzistojnë dy mundësi – një aleancë e re me partinë e qendrës së majtë, Partinë Demokratike, ose pajtimin me partnerin e saj aktual, Lidhjen e krahut të djathtë të Matteo Salvini, i cili gjithashtu nisi një iniciativë për rrëzimin e qeverisë aktuale.
Partia Demokratike në opozitë ka shprehur gatishmërinë e saj për të punuar me Lëvizjen 5 Yje, një kundërshtar i hershëm, për të formuar një koalicion pro-evropian dhe për të parandaluar zgjedhje të parakohshme dhe stopimin e mundshëm të pushtetit të Salvinit, i cili aktualisht po shijon popullaritetin më të lartë në mesin e votuesve. /tesheshi.com/
