Qeveria e Venezuelës është detyruar të marrë drastike për t’i bërë ballë një krize energjitike që sa vjen e përkeqësohet. Nga java e ardhshme, në tërë vendin do të ketë ndërprerje të energjisë elektrike për katër orë, diçka që do të bëhet zyrtare tashmë, pasi qytetarët po i përjetojnë prej kohësh ndërprerje të tilla.
Një thatësirë e tejzgjatur për shkak të fenomenit El Nino bëhet përgjegjëse për krizën energjitike, duke mos përjashtuar as aktet e sabotimit, sipas qeverisësve të vendit. Përndryshe, një pjesë ia vënë fajin mungesës së investimeve në infrastrukturë.
Lajmin për ndërprerjen e përditshme të energjisë elektrike e dha ministri i Energjitikës, Luis Motta, duke u bërë thirrje qytetarëve të Venezuelës të tregojnë patriotizmin e tyre. Ndërprerja do të zgjasë për së paku 40 ditë; ajo është e kushtëzuar dhe me rritjen e nivelit të ujit në digën Guri, prej nga sigurohet edhe pjesa më e madhe e energjisë elektrike për vendin.
Shpallja e së premtes ditë pushimi është mes masava të tjera të marra më herët për përballimin e kësaj krize. Mund të duket qesharake, por presidenti Nicolas Maduro u ka sugjeruar grave të mos i përdorin tharëset e flokëve, e po ashtu të hiqet dorë nga hekurosja e rrobave.
Venezuela po vuan nga një rënie e ndjeshme e ekonomisë, më së shumti për shkak të reduktimit të të ardhurave nga nafta e të inflacionit. /tesheshi.com/
