Nga: Mensur Krasniqi
Problemet ekonomike të Maqedonisë nuk kanë të ndalur. Jo më larg se para një muaji, Ministria e Financave vuri në pah në raportin e saj se Maqedonia e ka borxhin publik 4.3 miliardë euro, që në fakt përbën 45 për qind të prodhimit vendor bruto. Megjithatë, kjo nuk e pengoi aspak qeverinë e Gruevskit dhe të Ali Ahmetit që të huazojë edhe 10 milionë euro të tjera nga kreditorët vendorë në ankandin e letrave me vlerë. Me këto para, sipas qeverisë, duhet të kthehet një borxh prej 5.1 milionë eurosh. Ndërsa ende nuk dihet ku do të përfundojnë paratë e tjera.
Sipas profesorit universitar dhe ekspertit ekonomik Hamit Aliu, marrja e kredive për të mbuluar kredi të tjera është një lajthitje e qeverisë maqedonase. Që, siç e përshkruan ai, “duke dashur të heqë vetullat, ka nxjerrë sytë”.
“Ne nuk duhet të befasohemi fare me borxhet që i merr dhe i ka Republika e Maqedonisë. Ndryshe, menaxhimi është art dhe shkencë, ndërsa ne për fat të keq jemi larg kuptimit të menaxhimit si të tillë, dhe larg menaxhimit të shekullit XXI. Maqedonia është si shembulli i një borxhliu apo shtëpiaku kur s’di të menaxhojë, dhe duke dashur të heqë vetullat, nxjerr sytë. Argument i kësaj është se ekonomia e Maqedonisë në 10 apo 15 vitet e fundit shkon në vobekësi shumë të madhe. Pra, ka humbur konceptin, kuptimin, e strukturës ekonomike, ka humbur konceptin e sistemit ekonomik, dhe aspak nuk ka çarë kokë për mirëqenien ekonomike të banorëve të vet. Tash mundohet nëpërmjet marrjes së kredive të shpresojë se nesër do të bëhet më mirë. Nuk mund të bëhet më mirë nëse nuk ke krijuar sistem të mirëfilltë ekonomik, që ta dish se si nesër do të dalësh nga kjo krizë ekonomike. Është e vërtetë se mund të dalësh prej krize, por jo me këta njerëz, se tek e fundit shumë me rëndësi është kush e menaxhon, sa di dhe si e kupton, ekonominë e tregut,” deklaroi eksperti ekonomik Hamit Aliu.
Ai shtoi se nuk është e logjikshme që shpenzimet e tërësishme të një qeverie të jenë më të mëdha se sa të hyrat nga ekonomia.
Ky vendim i qeverisë aktuale, për t’u futur në një borxh të ri për të mbuluar borxhin e vjetër, nuk është mirëpritur as edhe nga opozita maqedonase. Sipas saj, kjo qeveri është në kolaps ekonomik, dhe së shpejti do t’i vijë fundi. /tesheshi.com/
