Situata e paprecedent në Kosovës, ku krizës së koronavirusit i është shtuar dhe ajo politike, ku LDK kërcënon me prishje koalicioni me rrëzimin e qeverisë së Albin Kurtit, ka çuar në reagimin e BE-së.
Njeriu që përfaqëson Brukselin në Prishtinë, ambasadorja Nataliya Apostolova, tha kriza politike është e pavend në këtë situatë.
“Ne po ndjekim nga afër zhvillimet në vazhdim në Kosovë. Situata aktuale e pashembullt e shpërthimit të COVID-19 bën thirrje për konsensus, unitet politik dhe qëllim të përbashkët në krizë”, tha Apostolova për mediat e Prishtinës.
“Partitë politike duhet të kujdesen para së gjithash për mirëqenien e popullit të Kosovës mbi ndonjë interes partiak”, ishte mesazhi që ajo përcolli.
Ndërsa Uashingtoni ka zgjedhur të heshtë ndaj asaj që po ndodh në politikën kosovare, duke zgjedhur ta përqendrojë vëmendjen vetëm te koronavirusi.
“Ambasada nuk ka asnjë koment në këtë kohë për situatën politike. Ne vazhdojmë të bashkëpunojmë me institucionet e Kosovës për të tejkaluar sfidën e virusit COVID-19”, thuhet në një përgjigje të thatë të ambasadës. /tesheshi.com
