Nëse Vicenso Montela nuk fiton dy ndeshjet e rradhës që Milan do të luajë me AEK-un për Ligën e Europës dhe Sasuolon në kampionat, atëherë ai shkarkohet direkt nga detyra e trajnerit dhe vendin e tij e zë Xhenaro Gatuzo. Ky është vendimi që kanë marrë drejtuesit e klubit kuq e zi, pas rezultateve jo të kënaqshme që Milan ka arritur nga fillimi i sezonit e deri më sot.
Pasi “e kanë falur” disa herë Montelën, duke i dhënë gjithnjë një tjetër shans, drejtuesit e klubit gjykojnë që “ujët e gamiles së tij është sosur”. Gjithnjë nëse trajneri nuk bën diçka “për të mbledhur” ekipin, e për ta çuar drejt rezultateve vijuese dhe jo sporadike, siç ka ndodhur deri më sot.
Por nëse dy fitoret e radhës janë ultimative, kjo nuk do të thotë se Montela e ka të sigurtë vazhdimësinë, pasi nëse bën “xhap” në ndonjë përballje tjetër, sërish rrezikon pankinën.
Në kampionat Milan renditet në vendin e 9-të, i larguar shumë prej Napolit e Juventusit, ndërsa në Europa League, nuk i ka punët edhe aq mirë, nëse nuk “rreshton” disa rezultate pozitive.
Nga ana tjetër, përfshirja e Gatuzos në “meselenë” e drejtimit të skuadrës, është parë si zgjidhje deri në fund të sezonit.
Xhenaro që dha aq shumë për Milanin si lojtar, mendohet të përçojë tek futbollistët aktualë, grintën e tij atipike për një lojtar, si edhe të rrisë besimin, qoftë edhe duke “i ulëritur” ndonjërit në fytyrë, qoftë ky “senator” në skuadër, apo i sapoardhur. E këtë pjesë, Gatuzo ka dëshmuar që nuk e ka problem, pavarësisht kë ka përballë. Ndërkohë Milani ka vendosur në shënjestër disa objektiva për merkaton e janarit, pasi blerjet e verës, po rezultojnë lojtarë mediokër dhe jo deçizivë, sic ka patur gjatë gjithë historisë së Milanit.
Tashmë skenari është i qartë: Montela e di se sa mund të rezistojë “si pilot i avionit”, ndërkohë që në “pistë”, Gatuzo ka nisur “nxehjen”. /tesheshi.com/
