Shtetet e Bashkuara do të heqin sanksionet 33-vjeçare mbi pajisjet ushtarake në Qipro dhe do të thellojnë bashkëpunimin e sigurisë me Nikosian, njoftoi Sekretari i Shtetit i SHBA, Mike Pompeo.
Pompeo shkroi në Twitter se Shtetet e Bashkuara do të heqin sanksionet për pajisjet ushtarake në Qipro gjatë vitit të ardhshëm fiskal, raporton Reuters.
Pas një bisede telefonike me Pompeo, Presidenti qipriot Nicos Anastasiades shkroi në Twitter se ai e mirëpriti masën nga autoritetet amerikane.
Ministri i Jashtëm turk Mevlut Çavusoglu tha se vendimi “neglizhon barazinë dhe ekuilibrin” në ishull dhe se Ankaraja pret që ajo të rishikohet.
Ai paralajmëroi që Turqia, nëse nuk do të ishte kështu, “do të ndërmarrë hapat e nevojshme reciproke, në përputhje me detyrimin e saj ligjor dhe historik për t’i garantuar sigurinë popullit turk në Qipro”.
Tensionet midis Turqisë dhe Greqisë
Ankaraja dhe Athina kanë thënë se janë të gatshëm për të zgjidhur çështjen përmes dialogut, por të dy palët këmbëngulin gjithashtu në mbrojtjen e të drejtave të tyre.
Vendimi erdhi mes tensioneve në rritje në Mesdheun lindor midis Greqisë dhe Turqisë mbi të drejtën për burime të mundshme të naftës dhe gazit.
Uashingtoni vendosi kufizime në pajisjet ushtarake në Qipro në 1987 për të inkurajuar bashkimin dhe për të kufizuar garën e armëve në ishull, të ndarë midis komuniteteve greke dhe turke.
Qipro u nda në 1974 pas pushtimit turk dhe disa përpjekje për një armëpushim midis të dy palëve përfunduan me dështim. /tesheshi.com/
