Presidenti turk Rexhep Tajjip Erdogan, tha se që nga masat e fundit të marra për mbrojtjen e monedhës vendase, depozitat në lira turke janë rritur me më shumë se 23.8 miliardë lira dhe vazhdojnë të rriten me shpejtësi, raporton Anadolu Agency (AA).
Vlera e dollarit amerikan kundrejt lirës turke ka rënë që nga e hëna dhe ka arritur ditën e djeshme në 10.25, vlera më e ulët që nga 16 nëntori.
Në fillim të kësaj jave, vlera e dollarit kundrejt lirës turke ishte rekord 18.3674, por vlera e lirës filloi të rritet ndjeshëm pas deklaratave të presidentit Erdogan për programin ekonomik. Deri më tani, vlera e dollarit ndaj lirës ka rënë me më shumë se 40 për qind.
Erdogan ishte i ftuar në një program special të katër televizioneve turke – A Haber, ATV, A Para dhe A News dhe foli për aktualitetin, duke iu referuar posaçërisht lëvizjeve të fundit të kursit të këmbimit dhe forcimit të lirës turke ndaj dollarit.
“Qytetarët aktualisht kanë dy garanci: njëra është Banka Qendrore e Republikës së Turqisë dhe tjetra është Thesari. Pra, qytetarët nuk do të humbasin”, tha Erdogan.
Duke iu përgjigjur disa pretendimeve se mekanizmat e përmendur nuk janë në përputhje me Kushtetutën, Erdogan e hodhi poshtë këtë dhe tha se pretendimet e tilla nuk kanë bazë.
“Stabilizimi i kursit të këmbimit do të arrihet sa më shpejt të jetë e mundur”, tha Erdogan.
Presidenti turk foli edhe për vaksinën turke anticovid Turkovac, e cila mori licencën e urgjencës këto ditë dhe tha se vendi i tij është një nga nëntë në botë që ka prodhuar vaksinën e vet anticovid.
“Turqia do t’i sigurojë të gjithë njerëzimit një vaksinë vendase kundër COVID-19, Turkovac-in,” tha Erdogan. /tesheshi.com/
