Nga Blendi Gashi
Kuvendi i Kosovës në sesionin vjeshtor nuk ka arritur të mbajë seancë plenare pa konfrontime dhe ndërprerje. Kështu, institucioni ligjvënës në vend, ka hyrë në një qorrsokak të thellë. Opozita ka paralajmëruar se aksioni i gjuajtjes me vezë ndaj kryeminsitrit do të jetë vetëm fillimi i kundërshtimeve të tyre kundër katër marrëveshjeve të arritura në Bruskel.
Por, si të dilet nga kjo katrahurë e krijuar politike?
Cila do të ishte zgjidhja që Parlamenti të mos kthehet në “arenë lufte”, por vend ku debatohet për një jetë sa më të mirë për qytetarët e vendit?
Njohësit e rrethanave politike në vend, thonë se zgjedhjet janë rruga e vetme që të dilet nga ngërçi politik sepse Kuvendit vetëm po i humb legjitimiteti.
Organizatat joqeveritare thonë se presidentja e vendit, Atifete Jahjaga duhet të vërë në funksion përgjegjësitë e saja kushtetuese dhe të kontribuoj në nxitjen e bashkëpunimit politik mes pozitës dhe opozitës.
Njohësi i rrethanave politike në vend, Avdulla Bytyqi, ka thënë për portalin ‘Te Sheshi’, se gjuha e degraduar parlamentare po prodhon situata të pakëndshme në Parlamentin e Kosovës dhe në mënyrën se si po zhvillohen gjërat, ndoshta zgjedhjet e reja të parakohshme janë zgjidhja më e mirë për vendin. 
“Vokabulari jo etik i përdorur si nga pozita ashtu edhe nga apozita po e tensinon situatën dhe po e bën të pashtegdalje. Në temat si Asociacioni dhe Demarkacioni i kufrit me Malin e Zi është dashur të jenë bashkë pozitë e opozitë për hir të interesave nacionale. Nuk bëhet kjameti nëse shkohet në zgjedhje të reja, vetëm të merren shembull vendet e rajonit, Greqia, Maqedonia apo edhe vetë Serbia ku disa herë janë mbajtur zgjedhje për të provuar legjitimitetin e popullit. Kur konfliktet zënë vend përballë arësyes, kur edhe për temat me rëndësi të mëdha kombëtare nuk gjendet gjuha e përbashkët, atëherë nuk mbetet tjetër pos zgjedhje të reja. Këtij Kuvendi ngadalë po i humb legjitimiteti”, thotë Bytyqi.
Analisti Albinot Maloku, mendon se ulja për të biseduar mes pozitës dhe e opozitës nuk ka kuptim dhe nuk do të ishte aspak frytdhënëse. Sipas, Malokut, opsioni i vetëm që mund të ndihmonte situatën politike në vend janë zgjedhjet e reja dhe ardhja e një subjekti të ri politik.
“Të gjitha modalitetet janë vetëm pjesë e menaxhimit të krizës politike, ekonomike e të përgjithshme në Republikën e Kosovës”, ka deklaruar Maloku për portalin ‘Te Sheshi’.
Instituti Demokratik i Kosovës (KDI), thotë se thotë se acarimi i situatës, dhe veprimet që shkojnë përtej debatit politik nuk janë zgjidhje.
“KDI kërkon nga presidentja e vendit Atifete Jahjaga që t’i vë në funksion përgjegjësitë e saja kushtetuese dhe të kontribuoj në nxitjen e bashkëpunimit politik mes pozitës dhe opozitës në funksion të arritjes së unitetit për çështje të cilat nuk kanë konsensus politik e shoqëror”, thekson KDI.
Instituti Cilësor për Hulumtime Analiza dhe Trajnime – “iCHAT”, duke vlerësuar rrethanat në të cilat po kalon Republika e Kosovës, përmes një njoftimi ka theksuar se më 22 shtator në vazhdimin e seancës u shkatërrua demokracia parlamentare në Republikën e Kosovës dhe praktika parlamentare në Kosovë, dhe njëherit ky veprim i opozitës është degradim i institucionit më të lartë përfaqësues në vend.
“Veprimet e fundit në Parlament janë në dëm të imazhit të Republikës së Kosovës para Bashkësisë Ndërkombëtare, të cilat tregojnë jostabilitet edhe tek investitorët e huaj, duke dëmtuar drejtpërsëdrejti zhvillimin ekonomik të vendit”, thuhet në njoftim. /tesheshi.com/
