Kriza e Gjirit po reflektohet dhe në aspekte familjare. Kështu, nga Al Jazeera, kanalin “halë në sy” nga katërshja arabe që është pozicionuar kundër Katarit, pretendohet se Egjipti po mban nën arrest vajzën dhe dhëndrin e dijetarit Jusuf Kardavi, ky i fundit i konsideruar si një ndër “mendjet frymëzuese” të Vëllazërisë Muslimane, njëherësh kryetarit të Unionit Ndërkombëtar të Dijetarëve Muslimanë.
Al Jazeera shkruan se Ola al-Kardavi dhe burri i saj, Hisham Halet, janë arrestuar dhe ka qenë e planifikuar të lirohen pas 15 ditësh. Por tashmë ndalimi i tyre do të vazhdojë.
Sipas kanalit në fjalë, ata akuzohen se janë anëtarë të një organizate të paligjshme, duke iu referuar pikërisht Vëllazërisë Muslimane, e cila është e ndaluar në Egjipt.
Al Jazeera i është referuar avokatit të familjes, Ahmad Abu Ala Madi, i cili i ka thënë Anadolu Agency se çifti është ndaluar më 23 qershor pranë Sahel al-Shamali, në bregun verior të Egjiptit, gjatë kohës që ishin në pushime për Fitër Bajram. /tesheshi.com/
