Katari pretendon se Emiratet e Bashkuara Arabe kanë përhapur një “klimë frike” mes qytetarëve të saj në këtë vend. Ndërsa kriza e Gjirit ka shkuar në gjykatat ndërkombëtare, Doha i bën thirrje Hagës që të urdhërojë masa emergjente për të hequr kufizimet e vendosura nga Abu Dhabi ndaj Katarit në qershor të vitit 2017.
“Shumë shtetas nga Katari që ende banojnë në Emiratet e Bashkuara Arabe jetojnë në frikë të përhershme”, tha avokati i Dohas, Peter Goldsmith.
Më 7 qershor 2017, Arabia Saudite, Bahreini, Emiratet e Bashkuara Arabe dhe Egjipti ndërprenë lidhjet me Katarin dhe sajuan një bllokadë ndaj këtij vendi, duke e akuzuar atë për mbështetje ndaj terrorizmit.
Shumë masa ndëshkuese u vendosën nga katërshja, përfshirë dhe ndalimin e fluturimeve të Qatar Airëays mbi to, në kuadër të një bllokade.
Goldsmith u renditi gjyqtarëve të Hagës një sërë masash represive të pretenduara, duke përfshirë që çdo “udhëtim Katari drejt Emirateve kërkon një miratim të veçantë pa marrë parasysh rrethanat”.
Si shembull ai solli rastin e një gruaje nga Katarit më banim në Emirate, e cila kishte nevojë për trajtim të rregullt mjekësor në Bejrut. Mirëpo sa herë që largohej, ajo rrezikonte të mos kthehej më tek familja e saj në Emirate.
Studentët e Katarit në universitetet e Emirateve, thanë gjithashtu se po tërhiqeshin nga studimet.
Të gjitha këto u renditën nga avokati Goldsmith në Hagë.
“Kjo gjykatë është shpresa e vetme e Katarit për të ndaluar privimin e të drejtave themelore”, tha një zyrtar i Dohas në proces.
Por Emiratet e Bashkuara Arabe kanë insistuar që Haga të mos dëgjojë ankesat Katarit, duke theksuar se situata për qytetarët e saj që jetojnë në vend është ndryshe nga një vit më parë.
“Kjo nuk ka të bëjë me diskriminimin racial”, tha avokati Alain Pellet në mbrojtje të Emirateve.
“Katari ka dështuar të japë dëshmi për dëbime masive ose dëbime ose ndonjë veprim specifik që cenon të drejtat civile, të pronës apo të biznesit”, shtoi Saeed Alnowais, ambasadori i Emirateve të Bashkuara Arabe në Holandë.
Përpjekjet diplomatike deri më tani kanë rezultuar të pafrytshme në zgjidhjen e krizës që e ka bërë praktikisht të pavlefshëm Këshillin e Bashkëpunimit të Gjashtë vendeve. /tesheshi.com/
