Zyrtarë të kishës në Austri kanë shprehur mospëlqimin për sloganin e ri të kandidatit të së djathtës ekstreme në zgjedhjet presidenciale në Austri.
“Prandaj më ndihmo o Zot”, slogani i Norbert Hofer-it, është parë prej tyre si përdorim i emrit të Zotit për qëllime politike.
Në një deklaratë të përbashkët të përfaqësuesve protestantë të kishës thuhej se përdorimi i emrit të Zotit në sloganet e kandidatit të së djathtës ishte një abuzim me emrin e Tij e me fenë në përgjithësi.
Partia e Lirisë e kandidatit Norbert Hofer ka bërë fushatë kundër emigracionit, çka udhëheqësit e kishave protestante e kanë vënë në pah, duke thënë se Zoti ishte mbrojtësi i të dobtëve, e “që sot përfshijnë refugjatët dhe të huajt”.
Sekretari i përgjithshëm i Partisë së Lirisë, Herbert Kickl, reagoi duke deklaruar se slogani synonte të vinte në dukje mbështetjen e thellë te sistemi i vlerave të një kulture kristiane perëndimore.
Ndërkohë, Kisha Katolike nuk ka bërë asnjë deklaratë.
Një slogan tjetër i kandidatit të së djathtës ekstreme austriake është, “Norbert Hofer: për Austrinë me zemër e shpirt”.
Zgjedhjet e përsëritura presidenciale në Austri zhvillohen më 4 dhjetor. /tesheshi.com/
