Prokurimi i vaksinave për Ballkanin Perëndimor do të jetë një nga temat e diskutimit të liderëve të Bashkimit Evropian në takimin në 21 janar, u njoftua në Bruksel.
“Ne duhet të diskutojmë bashkëpunimin me vendet e treta në lidhje me vaksinat, të cilat duhet të trajtohen si një e mirë publike globale. Ne do të shohim se si mund t’i ndihmojmë partnerët tanë në rajon dhe më gjerë “, tha Presidenti i Këshillit Evropian Charles Michel.
Presidentja e Komisionit Evropian Ursula von der Leyen më parë ka thënë se vaksinimi kundër COVID-19 do të shpëtojë jetë dhe u bëri thirrje vendeve anëtare të përgatiten për fillimin e vaksinimit të qytetarëve të tyre, e më tej në Ballkanin Perëndimor.
“BE do të koordinojë dhurimet e vaksinave nga vendet anëtare, të cilat kryesisht do të synojnë të mbrojnë dhe punonjësit shëndetësorë në Ballkanin Perëndimor,” tha Von der Leyen.
Këto reagime vijnë pas kritikave të forta ndaj BE-së, sidomos nga kryeministri Rama, sipas së cilit Ballkani është lënë jashtë planit të Brukselit për vaksinim.
Në rajon, vetëm Serbia dhe Shqipëria kanë nisur vaksinimin, duke i siguruar vaksinat e para në rrugë bilaterale. /tesheshi.com/
