Nga Blendi Gashi
Vite më parë sa Thaçi udhëhiqte PDK-në dhe mbante postin e kryeministrit, kjo parti mbështeste fuqishëm EULEX-in, edhe pse ky mision për sundimin e ligjit arrestonte komandatët e UÇK-së kinse për krime lufte.
Edhe kur Kadri Veseli morri drejtimin e partisë asgjë nuk ndryshoi, pasi ai në qershor të 2016-tës kërkoi vazhdimin e mandatit të këtij misioni duke thënë se një qëndrim i tillë është pro SHBA-ve dhe BE-së.
Por një vit më pas, siç duket Veseli nuk mendon më njëjtë për EULEX-in, pasi partia e tij tashmë po kërkon llogari nga ky mision ndërkombëtar, siç thonë, për qasjen diskriminuese ndaj ish-ushtarëve të UÇK-së, për çka në shenjë pakënaqësie edhe e lëshuan seancën plenare të së enjtes.
Si arsyetim, PDK dha skandalin e fundit të paraqitur në EULEX nga ish-kyetari i gjyqtarëve të këtij misioni, Malcolm Simmons, i cili ka deklaruar zyrtarisht dhe publikisht se kolegë gjykatës kanë pasur qasje manipulative në rastet që nderlidhen me ish-ushtarët e UÇK-së.
Por veprim të njëjtë PDK nuk ndërmorri kur plasën skandalet e mëhershme në EULEX, andaj braktisja e seancës vë shumë pikëpyetje pas.
Opozitarët por edhe deputetë të caktuar të pushtetit, kritikat e PDK-së ndaj EULEX-it i lidhin me Gjykatën Speciale dhe eleminimin e Fatmir Limajt, ndërsa analistët e quajnë deklarime të papërgjegjshme dhe për të ikur nga problemet aktuale.
“PDK të flasë për krimet e EULEX-it”
Vetëvendosësi Glauk Konjufca mendon se PDK po i frikësohet, siç thotë, stuhisë nga Specialja, andaj po kërkon nga spektri politik të bëhen bashkë kundër EULEX-it.
“Deputetët e PDK-së folën për EULEX-in, dhe kur Vetëvendosje kundërshtonte EULEX-in dhe ftonte të kundërshtonte një mision, tash po ata PDK-ja po na ftojnë me ju bashku betejës së tre kundër EULEX-it dhe Gjykatës Speciale. A është kjo partia që tentonte të na nxirrte jashtë sepse kundërshtonim këtë gjykatë? Ndërsa tash na ftojnë që ta kundërshtojmë. Tash kur po e shohin stuhinë e kësaj Gjykata, janë në gjendje që ta kallin Kosovën, por ne nuk marrim pjesë në këtë kundërshtim”, tha Konjufca.
Deputeti i NISMA-s, Milaim Zeka, ka akuzuar PDK-në se në bashkëpunim me EULEX-in i kanë ngritur aktakuzë Fatmir Limaj.
“Nëse PDK dëshiron të vejë drejtësi në këtë vend, atëherë duhet të thërrasë seancë të jashtëzakonshme për të folur rreth krimeve të Prokurorisë së Kosovës dhe EULEX-it. Krerët e PDK-së e kanë ditur mirë se Salustro ka qenë kryeprokuror në bashkëpunim me PDK-në dhe me Beogradin. Krerët e PDK-së e dinë se prokurorja e EULEX-it Isabel Arnal ka marrë vendim në Brezovicë në villë, në takim me krerët e PDK-së për t’ia ngritur aktakuzën kryetarit të Nismës Fatmir Limajt. Nëse PDK dëshiron të vejë drejtësi në këtë vend atëherë duhet të thirrë seancë të jashtëzakonshme të flas për krimet e prokurorisë së Kosovës dhe për krimet e EULEX-it që janë duke bërë në Kosovë”, deklaroi Zeka.
Ja ç’thonë analistët…
Politologu Mentor Tahiri nuk e sheh të qëlluar braktisjen e seancës nga partitë në pushtet, pasi thotë se në jetën parlamentare nuk është e zakonshme që seancat të lëshohet nga një parti e cila gjendet në kuadër të shumicës parlamentare.
“Nga aspekti i veprimit politik, duhet thënë se është gjetur një arsyetim i fuqishëm, por megjithatë Kosova gjendet në një fazë kritike, kur përgjithësisht raportet me faktorin ndërkombëtarë janë destabilizuar. Në këtë drejtim, krijohet përshtypja sikurse në Kosovë dikujt po i përshtatet një lloj ‘tronditjeje’, por që nuk i konvenon qytetarëve të Kosovës. Rëndom, këto ‘tronditje’ kanë prirje që çështjet jetësore dhe problemet e vërteta politike e ekonomike të vendit t’i shtyjnë në plan të dytë”, thotë Tahiri për tesheshi.com.
Njohësi i rrethanave politike, Faik Krasniqi, e quan tejet qesharake dhe të papërgjegjshme braktisjen e seancës nga partitë në pushtet, sidomos nga PDK-ja e cila jo vetëm që ka mbështetur mandatin e EULEX-it, por kërcënonte partitë që kundërshtonin punën e këtij misioni.
“Se çfarë fshihet pas ikjes së tyre nga seanca, mund vetëm të spekulojmë. Por ky mision përveç që ka qasje selektive të EULEX-it karshi gjykimeve ndaj pjesëtarëve të UÇK-së, për gjoja krime gjatë luftës së fundit, nuk ka asnjë rast që e ka dënuar ndonjë peshk të madh për afera korruptive. Në anën tjetër me krimet e serbëve ndaj shqiptarëve është marrë fare pak. Edhe ato raste që i ka trajtuar në fund i ka shpallur si të pafajshëm”, thotë Krasniqi për tesheshi.com. /tesheshi.com/
