Nga Gjergji Koja
Tre ditë më parë, ish-kryeministri Sali Berisha artikuloi disa akuza në drejtim të Lulzim Bashës, përfshi këtu hartimin e listave të kandidatëve për deputetë dhe këshilltarët elektoralë të kreut demokrat, që i quajti mizerabël.
Kjo ishte hera e parë që Berisha kritikonte Bashën, edhe pse iu kërkua me ngulm përpara zgjedhjeve të 22 korrikut në PD që të mbante një qëndrim të qartë mbi proçesin në partinë më të madhe opozitare.
Berisha në atë kohë mbështeti hapur Bashën, duke legjitimuar proçedurat e zgjedhjeve, edhe pse emra të rëndësishëm në historinë e PD-së kundërshtonin mënyrën e zgjedhur nga lidershipi i kësaj partie.
Por, ish-kryeministri zgjodhi një tjetër moment për t´u shprehur qartë se ajo që kishte ndodhur nuk ishte vendimmarrje e tij, madje as ndarje përgjegjësie me Bashën. Lideri që udhëhoqi PD-në për të paktën 23 vjet, tha qartë se listat u bënë nga Basha dhe ai kurrë nuk do të hartonte një të tillë, ndërsa dha sinjalin që të pakënaqurit të angazhohen në PD.
Indirekt Berisha dha mendimin e tij të prerë se nuk do të mirëpriste një zhvillim që grupimi tashmë i njohur si anti-Basha të krijonte një parti të re, sikundër flitet në qarqe të caktuara.
Pas deklaratës së Berishës pati një reagim të Bashës, sipas të cilit vija e kuqe është Partia Demokratike. Pra, Basha tha se nëse kritikët e tij nuk do të punonin kundër PD-së apo militantëve të saj, atëherë asgjë nuk do të varej nga humori i kryetarit apo i tyre në bashkëpunimin politik.
Astrit Patozi paralajmëroi në anën tjetër krijimin e një grupimi brenda PD-së, ku do të përfshihen ata që sot janë kundërshtarët më të fortë të Lulzim Bashës, ish-kryetarja e Kuvendit, Jozefina Topalli dhe ish-ministrja e Integrimit, Majlinda Bregu.
Nga ajo që të paktën deklarohet publikisht, duket se Berisha do të jetë në mes të grupimeve, pra mes Bashës dhe kundërshtarëve të tij dhe ndoshta do të angazhohet për të amortizuar goditjet nga dy anët, që mund të çonin në një ndarje përfundimtare të PD-së dhe themelimin e një tjetër partie.
Topi duket sikur është në fushën e Bashës, i cili duhet të krijojë një dritare apo të hapë një derë, për të përfshirë të pakënaqurit në forumet e partisë.
Me përjashtim të Jozefina Topallit, e cila si ish-kryetare e Kuvendit ka një vend në Këshillin Kombëtar, të tjerët duhet të votohen nga Kuvendi i kësaj partie për të qenë pjesë e këtij forumi.
Në këto kushte, Basha, të paktën sipas zhvillimeve të deritanishme, ose duhet që të lejojë një garë për postet dytësore në parti, nënkryetarët dhe sekretariatin, ose duhet të legalizojë fraksionet, dhe kundrejt kësaj, fraksionistët do të kenë kuotat e tyre në forumet drejtuese, Kryesi dhe Këshillin Kombëtar.
Në anën tjetër, grupimi anti-Basha, ka marrë sinjalin se nëse do të punojnë kundër PD-së atëherë nuk kanë vend në këtë parti, çka do të thotë se ata duhet të nisin angazhimin dhe të japin kontributin në këtë parti.
I vetmi që mund të luajë një rol rregullatori duke mbajtur palët brenda çatisë së PD-së është Berisha. Ai është e vetmja pikë kontakti e përbashkët mes Bashës dhe kundërshtarëve të tij. Muajt e fundit kanë treguar se Berisha ka pasur kontakte me grupimin e kundërshtarëve të kreut demokrat, ku herë pas here afrohet edhe dhëndrri i tij, Jamarbër Malltezi. Në anën tjetër është pranuar publikisht se Basha konsultohet me ish-kryeministrin, pavarësisht se thuhet se vendimmarrja përfundimtare është në dorën e Bashës.
Pra Berisha për momentin është i vetmi që mund të mbajë nën kontroll situatën në PD dhe të parandalojë një çarje të saj.
Koha do të tregojë nëse do të mundet që të bindë grupimet për të ndenjur nën një “çati” apo do të humbasë durimin dhe do të përcaktojë përfundimisht se çdo të ndodhë me partinë që e drejtoi për më shumë se dy dekada.
Zgjedhjet e 2019-ës janë testi i rradhës për Bashën si kryetar i PD-së dhe deri atëherë, secili nga grupimit do të përpiqet të fitojë terren në fushën e demokratëve. /tesheshi.com/
