Numri dy i grupit parlamentar socialist, Erion Braçe ka sulmuar ashpër kreun e bashkisë së Tiranës, Erion Veliaj.
Një ditë para Asamblesë së PS-së ku pritet një raportim të kryebashkiakëve, Braçe ka rënduar dorën. Në një postim në faqen e tij në rrjetet sociale, Erion Braçe akuzon kryetarin e bashkisë për lejet që i ka dhënë Samir Manes dhe Pandi Carapulit. Të dy biznesmenët janë akuzuar edhe nga opozita si klientë të mazhorancës në vend.
Në një postim të gjatë, Erion Braçe ka hedhur akuzat më të forta që ngjajnë me ato të një demokrati nën ethe militantizimi.
“Lali, na thuaj të jetojmë pa frikë pa mbyllur penxheret që të mos na shohin e mos na dëgjojmë kur jetojmë!”.
Kështu shkruan deputeti socialist që më pas rendit një pamflet mjaft të gjatë ndaj kryebashkiakut të Tiranës. Erion Braçe përmend “Saimirin”, që dukshëm e ka për Samir Manen. Gjithashtu Braçe sulmon edhe Pandi Carapulin dhe një një ish-deputet biznesmen por që nuk e përmend me emër.
“Kjo është e ardhmja dhe siç e shihni, shtëpia ime do jetë e pajetueshme!”, thotë deputeti socialist, i cili nuk është qytetar, por një pjesëtar i mazhorancës qeverisëse. Atij nuk i mjaftojnë ankimet, pasi ka mundësi të marrë vendime politike…/tesheshi.com/
