Mbrëmë, Papa Françesku lavdëroi virtytet e përulësisë gjatë një meshe në Bazilikën e Shën Pjetrit në Romë për të festuar natën e Krishtlindjes.
“Jezusi lindi në varfëri. Kjo duhet të na kujtojë se shërbimi ndaj të tjerëve është më i rëndësishëm sesa kërkimi i statusit në shoqëri. Jezusi dëshiron të lavdërohet përmes të varfërve. Në këtë natë dashurie, le të kemi frikë vetëm nga një gjë të mos i shkaktojmë dhimbje atij me indiferencën tonë, duke përçmuar të varfërit”, tha Papa Françesku.
“Të mos ankohemi për madhështinë që nuk kemi. Le të mos ankohemi dhe të përmbahemi nga lakmia që na lë gjithmonë të pakënaqur”, kërkoi kreu i Kishës Katolike.
“Le të zgjohemi, sepse sonte drita është ndezur, dritë e mirë, duke na kujtuar se, në vogëlsinë tonë, ne jemi bij e bija të dashur, fëmijë të dritës”, shtoi Papa Françesku.
Ai tha se Krishtlindja është një kohë kur të gjithë duhet të gjejnë guximin për të ulur armët, për të hequr maskat e roleve të tyre, për njohjen personale shoqërore dhe për të përvetësuar përulësinë. /tesheshi.com/
