Të krishterët katolikë kremtuan në mesantë Krishtlindjet, ku gjuha klerikale, në mesazhet e saj shkoi atje ku “dhemb dhëmbi”, te situata politike e sociale në vend.
Imzot George Frendo, kreu i katolikëve shqiptarë, ftoi politikën që të dialogojnë për të së tashmes e së ardhmes së Shqipërisë, siç tha ai, për të mos lejuar të rinjtë që largohen nga Shqipëria.
“Para disa ditësh isha në një takim me disa studentë, u mërzita kur të gjithë shprehën dëshirën të emigrojnë. Po humbasim shumë persona, që numërohen ndër elementët më të çmuar, kjo është varfëria më e madhe për Shqipërinë. U lutem pozitës dhe opozitës të ulen së bashku në një tryezë dhe të diskutojnë këtë problem si mund të tërhiqen investitorë në këtë vend të bukur dhe të hapin vende pune. Me një vullnet të mirë mund të ndërtojmë një Shqipëri më të mirë, më të drejtë më të lumtur. Populli shqiptar ka vuajtur shumë. Ruaje o Zot Shqipërinë!”, u shpreh kleriku i lartë. /tesheshi.com/
