Është kthyer në fenomenin e ditës së sotme gjatë protestës së PD-së në liqenin Artificial të Tiranës, një akuzë e disa mediave bazuar në foto ku deputeti i PD-së Gent Srazimiri aludohet se ka një pistoletë në brez.
Pas publikimeve në media, nënkryetari i grupit të PS-së, Taulant Balla, ka kërkuar që PD të distancohet nga Strazimiri dhe ta largojë.
Ndërkaq PD-ja nuk e pranon që Strazimiri ka patur armë, kurse deputeti ka lëshuar një deklaratë jo shumë të qartë.
Në daljen mediatike pas përfundimit të mbledhjes së jashtëzakonshme të Kryesisë dhe Grupit Parlamentar të Partisë Demokratike, të thirrur nga kryetari Basha, Arben Ristani u pyet edhe për armën e Gent Strazimirit.
Gjatë ditës Ristani e pati quajtur mashtrim mediatik qarkullimin e këtij lajmi, ndërkohë që vetë Strazimiri nuk e ka mohuar, por as e ka pohuar se në protestën tek Parku i Liqenit ishte i armatosur. “Është një mashtrim mediatik ndaj deputetit Strazimiri. Fotoja nuk tregon asgjë. Për mua ka qenë këllëf i celularit. Nuk ka fakte sepse nuk kishte armë”, tha ai.
/tesheshi.com/
