Nga Blendi Gashi
Presidenti Thaçi, me deklaratën e bërë se “kriminelët serbë që kanë kryer krim, nuk do të mund të kthehen kurrë në Kosovë, por kudo që gjenden, ata që kanë kryer krime dhe vrasje, nuk do të jenë të qetë derisa të japin llogari para drejtësisë”, u mundua të qetësojë nënat gjakovare që i bën thirrje të mos lejoi vizitën e pelegrinëve serbë në qytetin e tyre.
Por në anën tjetër, ka ngjallur jo pak reagime te ish-shokët e idealit e njohës të fushës së drejtësisë, pjesa e parë e deklaratës.
Ata e cilësojnë një huqje të madhe të presidentit, pasi thonë se kriminelët serbë duhet të përballet me drejtësinë kosovare për krimet e kryera gjatë luftës.
Ish-kryetari i Kuvendi, Jakup Krasniqi vlerëson se presidenti duhet ta kërkojë të kundërtën, duke thënë se kriminelët serbë duhet të arrestohen.
Krasniqi përmes një shkrimi në Facebook ka marrë si shembull Izraelin, i cili ka ndjekur dhe vazhdon t’i ndjekë kriminelët e Luftës së Dytë Botërore.
“Shteti i Izraelit i ka ndjekur dhe vazhdon t’i ndjekë me sukses kriminelët nazist të Luftës së Dytë Botërore të cilët kanë marrë pjesë në planifikimin dhe zbatimin e politikave të gjenocidit kundër hebrenjve kudo ku ata kanë arritur të fshihen që t’i sjellë para drejtësisë! Ky është një shembull i njohur sesi duhet e drejta të shkoj deri në fund. Presidenti i Kosovës në vend se të kërkojë nga Serbia ekstradimin e kriminelëve që kanë planifikuar dhe zbatuar politikat e gjenocidit serb ndaj popullsisë civile të pafajshme në Kosovë, ai nënave gjakovare ju thotë: ‘se kriminelët që kanë kryer krime, kurrë nuk do të kthehen në Kosovë!’ Presidenti dhe drejtësia në Kosovë nuk duhet të kërkojnë ndalimin e hyrjes në Kosovë të kriminelëve, por arrestimin dhe ndalimin e gjithë atyre që hyjnë në Kosovë dhe sjelljen para drejtësisë sonë dhe duhet bërë kërkesën për ekstradimin e secilit nga kriminelet që fshihen kudo, qoftë në Serbi apo kudo tjetër!”, shkruan Krasniqi.
Edhe Ehat Miftaraj, nga Instituti i Kosovës për Drejtësi (IKD) ka kritikuar Thaçin për deklaratën e bërë, duke thënë se kriminelët dhe vrasësit që kanë kryer krime lufte në Kosove, duhet mu kthy në Kosovë, mu përballë me forcën e ligjit.
“Duhet Republika e Kosovës përmes Prokurorisë të lëshoj fletëarreste ndërkombëtare ndaj atyre që kane kryer krime lufte në Kosovë. Ama kjo nuk realizohet me një ose dy prokurorë në Prokurorinë Speciale. Kjo nuk realizohet nëse nuk ka vullnet politik. Viktimat e luftës dhe familjaret e tyre kanë pritur dhe presin minimumin e kujdesit nga shteti për të hetuar, gjykuar dhe dënuar ata që kanë kryer krime. Kjo nuk po ndodh. Nuk ka vullnet politik”, thotë Miftaraj. /tesheshi.com/
