Një mashtrim që përdor inteligjencën artificiale dhe synon gati dy miliardë përdorues të Gmail-it është etiketuar si jashtëzakonisht i dëmshëm për viktimat.
Siguria e të dhënave tona po bëhet një çështje gjithnjë e më sfiduese në një botë ku mjafton vetëm një klikim i gabuar që pajisjet dhe fjalëkalimet tona të përfundojnë në duart e atyre që duan të shfrytëzojnë dobësinë tonë.
Pavarësisht nëse bëhet fjalë për vjedhje identiteti ose zbrazje të plotë të llogarive bankare, viktimat mbeten të shokuar kur kuptojnë se janë bërë objektivi i një mashtrimi të sofistikuar që nuk e kanë vënë re.
Kriminelët kibernetikë tani po përdorin AI për të krijuar thirrje telefonike bindëse, më pas për të dërguar e-mail të rremë që duket se vijnë nga Google. Sipas mashtrimit, pas telefonatës, përdoruesit informohen se do të marrin një e-mail me një lidhje që të çon në një faqe të rreme të Google. Duke klikuar në atë lidhje, mashtruesit mund të vjedhin të dhëna të ndjeshme, duke përfshirë informacionin financiar.
Spencer Starkey nga SonicWall paralajmëroi për zhvillimin e vazhdueshëm të kërcënimeve të reja nga kriminelët kibernetikë, ndërsa Pieter Arntz, një studiues në Malwarebytes, vëren se mjetet që ata përdorin janë shumë të lira dhe lehtësisht të disponueshme. Sipas hulumtimit, sulmet e sofistikuara me email mund të fillojnë me vetëm 5 dollarë.
FBI paralajmëroi për këtë kërcënim qysh në vitin 2024, duke deklaruar se sulmuesit po përdornin AI për të krijuar mesazhe të rreme zanore, video dhe emaile që mundësonin mashtrimin. FBI ka paralajmëruar përdoruesit për sulme phishing duke përdorur inteligjencën artificiale.
Për t’u mbrojtur nga ky lloj mashtrimi, Malwarebytes këshillon që të mos klikoni kurrë lidhjet në e-mailet e papritura, dhe gjithashtu rekomandon përdorimin e një menaxheri fjalëkalimi dhe aktivizimin e vërtetimit me shumë faktorë (MFA) për të gjitha llogaritë. /tesheshi.com/
