Parlamenti holandez votoi për një rikthim vizave për shtetasit shqiptarë. Në një deklaratë pas votimit, si shkak i kësaj mase të kaluar nga ligjvënësit hollandezë, jepet kriminaliteti shqiptar.
“Parlamenti, pas diskutimeve, duke vënë në dukje se ka pasur një rritje të ndjeshme të kriminalitetit nga mafia shqiptare në Holandë dhe se këto organizata kriminale keqpërdorin mundësinë për të udhëtuar pa viza përmes Evropës që të zgjerojnë më tej rrjetin e kontrabandës, duke vënë në dukje se pezullimi i vizave për Shqipërinë u detyrua nga kushte të ndryshme, duke përfshirë parandalimin e krimit ndërkufitar, i kërkojmë qeverisë të paraqesë kërkesën në Komisionin Evropian për të filluar procedurën e frenimit emergjent për liberalizimin e vizave”, thuhet në deklaratën e parlamentit holandez pas votimit.
Kërkesa u votua nga 92 deputetë nga 150 që janë në total. Por nga ana tjetër, qeveria e Holandës është shprehur kundër rikthimit të vizave për shqiptarët. Ndërkohë, pavarësisht kërkesës, heqjen e vizave nga vendet Schengen nuk e vendos parlamenti i Holandës por ai i BE-së. Ndaj, akti ngjan më tepër simbolik se sa me efekt real. /tesheshi.com/
