Një ngjarje të rëndë të ndodhur mëngjesin e kësaj të hëne në Korçë, kreu demokrat Basha e ka parë vetëm politikisht. Një burrë vari dy fëmijët e tij të mitur e më pas veten, e kjo sipas Bashës tregon gjendjen dëshpëruese që ka përfshirë politikën shqiptare si pasojë e varfërisë.
“Jam i tronditur nga krimet e tmerrshme në familje në Fier dhe në Korçë. Jam veçanërisht i hidhëruar që këto krime kanë marrë jetë të pafajshme fëmijësh dhe grash. Këto ngjarje më shumë se krime individuale reflektojnë gjëndjen e varfërisë dhe dëshpërimit ku ka hyrë shoqëria jonë, si dhe rënien e mbështetjes shoqërore për njëri-tjetrin. Shqipërisë duhet t’i kthehet shpresa, duhet t’i kthehen mundësitë në mënyrë që të gjithë të jetojnë të mirëqenë dhe të qetë. Politika ka rolin kryesor për këtë gjë: ajo duhet të pushojë së punuari për pakicën dhe duhet t’u rikthehet njerëzve dhe halleve të tyre. Ne nuk mund të vrasim njëri tjetrin, duhet të vrasim politikën e keqe. Ne duhet të japim jetën për fëmijët tanë dhe jo të marrim jetë fëmijësh”, shkruan Basha në një status në FB.
Ndërkohë, për ngjarjen e rëndë është shprehur dhe kreu i Rendit, Saimir Tahiri. Edhe ky i fundit e ka lidhur krimin e pazakontë me politikën, por në një këndvështrim ndryshe nga ai i kreut demokrat.
Unë jam thellësisht i shqetësuar që dhuna promovohet në retorikën publike, jo rrallë edhe nga politikanët. Nuk ndodh rrallë që edhe në parlament të dëgjosh retorikë dhune. Të dëgjosh cilësime si: ‘ndrikulla apo lavire’, për deputetet gra në parlament. Apo të shohësh episode dhune të cilat nuk mbeten vetëm brenda mureve të parlamentit, por çojnë sinjale dhune dhe tek qytetarët. Ndaj unë them që politika t’i lërë dënglat dhe të promovojë qytetarë që respektojnë ligjin, qytetarë që nuk i dedikohen dhunës dhe të refuzojnë të gjithë së bashku dhunën”, tha ministri Tahiri, i cili, kërkoi aktivizimin e personave të mirëinformuar mbi rastet e dhunës në komunitete si një formë parandalimi të krimeve të tilla monstruoze. /tesheshi.com/
