Altin Hajri është më i kërkuari për momentin nga policia shqiptare. Pronar i kompleksit “Golden” në Xhafzotaj, ai akuzohet si koka e një rrëmbimi me pasojë vdekjen e shtetasin Jan Prenga. Gjithçka është zbardhur deri më tani nga policia e raportuar në media, ofrojnë tablonë e një makabriteti që rrënjët e sfondin bashkë i ka te trafiku i drogës.
Droga nuk është diçka e vonë në shoqërinë shqiptare. Ndër vite, ajo, aferat e saj janë strukturuar dhe do jenë kështu gjersa është diçka që e kërkon tregu; tregu i së keqes njerëzore, porsi të tjera të ngjashme.
Diferencën e kanë bërë ata që janë implikuar me to. Ka asish që ngjajnë zotërinj në jetë, por që kanë fije të padukshme në ato afera. Ka prej atyre me biznese të fuqishme, e që mjeshtërisht janë kamufluar për të MOS u bërë pis me imazhin e një njeriu të përzier në asi aferash. Ka sigurisht dhe nga ata që nuk kanë fare shpirt kriminal, e përkundrazi, në jetë janë babaxhanë të vërtetë. Një prej këtyre rasteve është ai i të ashtuquajturit “Eskobari i Ballkanit”, Klement Balili, asnjëhere me skedë kriminale, asnjëherë me përplasje me ndokënd, punëtor dhe i dashur për njerëzit. Por ka dhe prej atyre që janë bëjnë muuuu se janë të përzier në pisllëkun e drogës. Madje gati-gati sa nuk e shpallin publikisht që janë të tillë, por që gjithsesi e bëjnë nëpërmjet formave me të cilat e shpenzojnë paranë e fituar me grushta. Pa llogaritur makinat luksoze, ata dhe ndërtojnë në atë lloj forme e stili sa nuk lë asnjë dyshim për të burimin e atyre parave. Dhe një prej tyre është edhe kompleksi “Golden” në Xhafzotaj.
Ai lloj ndërtimi, i lidhur me staturën sociale të njeriut që e ka ndërtuar, i cili, siç po rezulton, paska qenë kontigjent i njohur krimi në zonë, është një akuzë e rëndë për shtetin. Shqipëria mund të ketë shumë horra që merren me punë të pista, por dreqi e morri është e vogël për t’u fshehur.
Altin Hajri, së bashku me të afërm, e ka ndërtuar perandorinë e tij, përfaqësuar nga një kompleks dasmash prej milionash, aty ku dhe shteti ka praninë më të madhe të tij për shumë arsye – pra mes Durrësit dhe Tiranës, ose më ngushtësisht, mes Durrësit dhe Shijakut, që në fakt është segmenti ku në mesin e viteve ’90 u shfaqën të dhënat e para të hyrjes së parave të drogës në tregun shqiptar.
Kujtojmë se vilat e para luksoze në Shqipëri nisën të ndërtohen pikërisht në këtë aks, të cilat, nga propaganda e kohës – RTSH-ja nën PD-në – servireshin në lajme si frytet e para të kapitalizmit.
E pra, duhej që Altin Hajri dhe Hajrat e tjerë, të rrëmbenin e vrisnin dikë në stilin alla Khashoggy, që të shpërfaqej në publik një bandë, një aferë, një skotë kriminelësh, të cilët pra, ndër vite vijojnë aktivitetin e tyre të pashqetësuar, edhe kur ja bëjnë me sy shtetit nëpërmjet investimeve të tilla si kompleks “Golden”. Ja bëjnë më sy dhe shoqërisë rreth e rrotull gjithashtu, që e di po aq mirë sa shteti se ku i ka marrë paratë ai birboja.
Një ditë më parë, në media u publikua rasti i përplasjes së Altin Hajrit me një bashkëfshatar të tij hidraulik, madje fqinj në fshatin prej nga ishin, i cili nuk qe paguar për punën e bërë në kompleks. Dhe Hajri, i përgjigjej në atë mënyrë, si për të treguar se ç’horr ishte, deri sa ia kish shkrepur dhe plumbat bashkëfshatarit që kërkonte hakun e punës.
Padyshim që dhe ky i fundit e ka ditur se me kë kishte të bënte; e ka ditur se ku e kanë burimin ato miliona ku ai po lidhte tubat e ujit, por ka preferuar më mirë të shoh hesapin e tij. Ka bërë denoncimin në polici vetëm kur Hajri ka tentuar t’i marrë jetën.
E gjitha kjo tablo, me të fortë e miliona që investohen prej tyre, nuk ka kurrë mundësi që mos njihet nga policia. Ndaj sot, kjo e fundit në përgjithësi e ata inspektorët e zonës në veçanti, duhet të jenë nën akuzë po aq sa Hajri. Sepse janë paguar me taksat tona për një punë që nuk e kanë kryer, e që ka qenë e lehtë për t’u kryer. Para syve të tyre, një njeri apo një grup njerëzish ka ndërtuar qartazi një çiban krimi e droge si kompleks “Golden”. Aty gjithçka ka qenë e qartë, se më e pakta, e qartë ka qenë për banorët e zonës, ata të cilët i kanë njohur Hajrajt se kush janë, nga e si e fitojnë paranë.
Në Shqipëri, si një shoqëi ende me tipare provinciale, nuk duhet shumë për ta njohur një njeri; mjaft t’i referohesh rrethit të ngushtë ku ai është rritur, në nivel qyteti, fshati apo lagjeje.
Pra, policia në zonë, ajo ku Hajrat njiheshin edhe me “Goldeni”-n e tyre, me gjasë nuk ka qenë e paditur dhe e painformuar mbi staturën sociale të atyre që e posedonin, se kush ishin dhe me ç’merreshin.
Ajo sot rend ta kapë Altin Hajrin, ndërkohë që aty e ka patur, para hunde. Dhe kjo është një akuzë e rëndë për të, po aq sa për Hajrin. Sepse, të paguhesh me taksat e njerëzve pa u shërbyer atyre duke e bërë zap krimin në kushte investuese, bie dhe kjo era bashkëpunim në krim! /tesheshi.com/
