Fotografi rrëqethëse të dhunës, torturës, vrasjeve, masakrimeve e gjenocidit serb mbi popullatën shqiptare të kryer nga ana e forcave ushtarako-policore dhe paramilitare serb, janë vendosur në oborrin e Kuvendit Komunal të Mitrovicës.
136 fotografi të rasteve nga Mitrovica janë ekspozuar nga ana KMDLNJ-së, qendra rajonale në Mitrovicë, me moton “Mos e harroni të kaluarën nëse dëshironi të ardhme të ndritur!”.
Fotografitë, paraqesnin kryesisht masakrat e kryera në Mitrovicë nga forcat serbe, duke filluar nga keqtrajtimi fizik e deri tek masakrimi i trupave të pajetë, djegia dhe karbonizimi i tyre.
“Fatkeqësia më e madhe është se njerëzit të cilët kanë bërë krime, vazhdojnë të punojnë në Policinë e Kosovës në veri”, ka thënë për media Halit Barani, kryetar i KMDLNJ-së për rajonin e Mitrovicës.
Në anën tjetër, kryetari i komunës së Mitrovicës, Agim Bahtiri, pasi hapjes së kësaj ekspozite rrëqethëse ka theksuar se populli shqiptar në tërësi nuk duhet të harrojë masakrimet e gjenocidin që kanë shkaktuar regjimi i Millosheviqit me forcat policore e ushtarake ndaj popullatës së pafajshme.
“Ai popull që e harron të kaluarën e tij, është i dënuar që historia do t’i përsëritet; por ne shqiptarët, duhet të falim me të vetmin qëllim, që të ndërtojnë një ahtet demokratik e të zhvilluar ekonomikisht, me qëllim që ky gjak i derdhur i këtyre njerëzve të shkojë për atë çka ata kanë luftuar, për pavarësinë e Kosovës, pavarësinë ekonomike e politike”, ka thënë Bahtiri.
“Jam thellësisht i tronditur me atë që janë duke e parë këtu me sytë e mi”, ka thënë Blerim Ibrahimi, banor i Mitrovicës. “Ne, banorët e Mitrovicës, e dimë në një farë mënyre se çfarë ka ndodhur dhe çfarë kanë bërë serbet në popullatën civile shqiptare, por kur një gjë të tillë e sheh me sy tani është tepër rrëqethëse”, ka shtuar ai.
Vizitorë të shumtë vlerësuan punën e palodhshme që ka bërë para, gjatë dhe pas luftës, kryetari i KMLDNJ-së, Halit Barani, i cili ka dokumentuar me fakte nga masakrimet dhe gjenocidin e ushtruar ndaj popullatës shqiptare nga forcat ushtarake, policore dhe paramilitare serbe.
Të 136 fotografitë do të qëndrojë ekspozuara.në oborrin e kuvendit komunal të Mitrovicës për 15 ditë me radhë. M.Mustafa – /tesheshi.com/
