Kthimi pas në kohë, duke prekur periudhën e luftës ka irrituar ministrin e Jashtëm të Serbisë, Ivica Daçiç, aq sa ka arritur edhe të braktisë një takim të rëndësishëm, siç është ai Varshavës në Poloni.
Në këtë mbledhje merrnin pjesë disa shtete të Ballkanit, mes tyre edhe ministri i Jashtëm i Kosovës, Enver Hoxhaj. Teksa ky i fundit ka folur për krimet në Kosovë dhe rajon, duke cilësuar fajtore Serbinë për gjenocid dhe krime lufte, ka bërë që shefi i diplomacisë serbe të mos ndihet mirë dhe të largohet. I pyetur për këtë veprim, Daçiç ka deklaruar se ëshë ndjerë i ofenduar nga këto deklarata dhe se nuk pati reagime nga Bashkimi Evropian, lidhur me këtë çeshtje.
“As Mogherini dhe as përfaqësuesit e tjerë të samitit nuk reaguan ndaj Hoxhajt, ndaj unë kam thënë se nëse mund të punohet pa Serbinë, atëherë vazhdoni, por unë do të largohem. Ne nuk mund të lejojmë askënd të na nënshtrojë, pasi ka ikur koha kur Kosova paraqet dhe kërkesat e saj plotësohen. Nuk duam të dëgjojmë leksione nga ata që kanë kryer krime ndaj serbëve”, u shpreh Daçiç.
Daçiç foli edhe mbi integrimin e Kosovës drejtë Bashkimit Evropian, të cilën ai e konsideroi si një “mirazh”.
“Marrëveshja e Stabilizim-Asociimit (MSA) që Kosova ka nënshkruar ka të bëjë me një territor dhe jo një shtet. Kjo MSA nuk është ratifikuar nga (BE) dhe nga Parlamenti Evropian”, ka thënë Daçiç./tesheshi.com/
