Një artikull i vitit 1953 në periodiken naziste “Neues Volk” titullohej “Hebreu kriminal”. Ky artikull tregon fotografitë e hebrenjve së bashku me krimet që ata dyshohet se kanë kryer. Në fjalimin e parë përpara Kongresit, presidenti Trump ngurroi të hynte në detaje, përveçse kur erdhi puna për një nga temat e tij të preferuara – krimet e kryera nga emigrantët.
Trump ngriti lart krijimin e zyrës për viktimat e krimit nga emigracioni, të ashtuquajturën Voice. Kjo zyrë, mes të tjerash, do të hartojë raporte të rregullta mbi veprat e paligjshme të emigrantëve pa dokumente. “Kam urdhëruar departamentin e Sigurisë së Brendshme për të krijuar një zyrë që të shërbejë për viktimat amerikane”, tha ai. “Ne do t’u japim një zë atyre që janë injoruar nga media jonë apo u është mbyllur goja nga interesa të veçanta”. (Zyra do të financohet nga paratë, që në vitet e Obamës, shpenzoheshin për avokatinë ndaj emigrantëve pa dokumente).
Programi është mjaft kontravers (kur Trump e njoftoi atë, demokratët psherëtinë). Nuk ka asnjë provë që emigrantët kryejnë krime në nivel më të lartë sesa ata që janë të lindur në Amerikë, dhe kritikët ngrenë shqetësimin se raportimet do të ndikojnë padrejtësisht në opinionin publik. “Le të jemi të qartë se çfarë po bën Donald Trump”, shkruan Bernie Sanders. “Ai po trazon frikën dhe urrejtjen ndaj emigrantëve dhe po përpiqet të përçajë vendin tonë”.
Ka një arsye përse kundërshtarët e Trump janë kaq të shqetësuar. Kjo strategji – e dizenjuar për të veçuar një grup të caktuar njerëzish – sugjeron se ka diçka veçanërisht djallëzore në mënyrën e sjelljes së këtij grupi. Kjo strategji është përdorur me efikasitet nga Adolf Hitleri dhe aleatët e tij. Në vitet 1930, nazistët përdorën taktikë të ngjashme për të rritur zemërimin dhe urrejtjen ndaj hebrenjve. Profesori Richard Weikart nga universiteti i Kalifornisë shpjegon se nazistët përdorën disa lloje të ndryshme mjetesh komunikimi për të shitur mesazhin se “hebrenjtë janë kriminelë nga natyra”, ashtu si e përcaktonte një direktivë naziste e vitit 1943 për shtypin gjerman. “Hebrenjtë nuk janë një komb si të tjerët, por mbartës të kriminalitetit të trashëguar”, thuhej në urdhër. Gjermania, me fjalë të tjera, ishte jashtë kontrollit, dhe vetëm politikat naziste anti-semite mund të “rikthenin rendin”.
Për të përhapur këto ide, kishte libra dhe filma që i portretizonin hebrenjtë më poshtë se njerëzit e tjerë. “Hebreu i Përjetshëm”, publikuar në vitin 1940, përshkruante hebrenjtë si parazitë kulturorë endacakë, të konsumuar nga seksi dhe paraja. Gazeta të tilla si “Der Stürmer” printonin rregullisht karikatura anti-semite. “Deri në fund të viteve 1930, toni fanatik në rritje i propagandës naziste reflektoi radikalizimin e politikave anti-semite të regjimit”, shpjegon BBC. “Stereotipet e hebrenjve të treguara përmes një propagande të tillë shërbyen për të përforcuar ankthin për zhvillimet moderne në jetën politike dhe ekonomike, pa u shqetësuar të pasqyrojnë realitetin e rolit të hebrenjve në shoqërinë gjermane”.
Madje, edhe ekspozitat e artit përforconin mesazhin. Në vitin 1937, në Mynih u hap ekspozita “Hebreu i Përjetshëm”. Qëllimi i deklaruar i saj ishte të tregonte “tiparet dalluese” të hebrenjve dhe të demostronte karakteristikat e tyre të lidhura me Lindjen e Mesme dhe Azinë”, thotë BBC. “Ekspozita gjithashtu u përpoq të ekspozonte një komplot mbarë-botëror hebre-bolshevik”. Më shumë se 5 mijë njerëz e vizituan atë çdo ditë. Policia sekrete raportoi me krenari se ekspozita çoi në një rritje të theksuar të ndjesive anti-semite dhe, madje, dhunës.
Sigurisht, raportimet e rregullta qeveritare janë shumë larg nga daullet agresive e të vazhdueshme të nazistëve kundër hebrenjve. Zyrtarët e Rajhut të Tretë kishin një kontroll domethënës më të madh ndaj asaj që i shfaqej publikut, sesa çdo president amerikan. Ata kontrollonin median dhe vendosnin se cili lloj arti lejohej dhe nuk lejohej në vend.
Heqja e një paraleleje të drejtë midis Trump dhe Hitlerit “të drejton në rrugë të gabuar”, thotë profesori Weikart. “Krimi i rëndë i Hitlerit ishte se nisi një luftë ekspansioniste dhe vrau miliona njerëz në emër të pabarazisë bilogjike të njeriut”, shkruan ai. “Çështja Trump nuk është vërtet në këtë nivel, apo jo”.
Thelbi nuk është se Voice barazohet me ministrinë e Ndriçimit Publik dhe Propagandës së Rajhut. Por, kur liderët përdorin mjetet qeveritare për të zgjuar frikën ndaj një grupi njerëzisht, të gjithë duhet të jenë të shqetësuar.
Përgatiti: Juli Prifti – /tesheshi.com/
