Në rrjete sociale dhe platforma të ndryshme për shitblerje në Kosovë, janë bërë dhjetëra shpallje ku qytetarët kanë ofruar për shitje votën e tyre për zgjedhjet e 6 tetorit. Shumë nga ata thonë se u është keqpërdorur numri i tyre.
Prokuroria po heton personat që i kanë publikuar këto shpallje, pasi shitja e votës është vepër penale.
Personat, të cilët nuk “numërohen vetëm në gishta”, kanë bërë oferta të shitjes së votës me cmime që luhaten nga 20 deri në 300 euro.
Prokurorja e shtetit, Laura Pula, pohon se është intervistuar një person, por që do të intervistohen edhe të tjerë që kanë publikuar të tjera njoftime në rrjetet sociale.
Prokurorja tha se për të ndjekur deri në fund veprën penale nuk do të kursehet as njësiti i posaçëm i krimeve kibernetike, i cili ka aftësi të lokalizoj “shitësit e votave”.
Zgjedhjet e 6 tetorit nga shumë parti politike po shihen si vendimtare për të ardhmen e tyre politike, duke qenë se vijnë pas dështimeve të përsëritura për të krijuar stabilitet, dhe pas një qeverie mbi të gjitha fragjile. /tesheshi.com/
