Geoffrey Hinton, një inxhinier i Google, i cili konsiderohet si kumbari i inteligjencës artificiale, dha dorëheqjen disa ditë më parë nga Google, raportoi New York Times.
Arsyeja e dorëheqjes është shqetësuese, pasi Hinton pretendon se dëshiron të flasë lirshëm për rreziqet e vazhdimit të zhvillimit të inteligjencës artificiale.
Dr. Hinton dhe dy nga studentët e tij të diplomuar në Universitetin e Torontos në vitin 2012 krijuan teknologjinë që është bërë themeli intelektual për sistemet e inteligjencës artificiale që kompanitë më të mëdha të industrisë së teknologjisë besojnë se janë çelësi i së ardhmes së tyre.
Ai deklaroi se ndjen pjesërisht keqardhje për kontributin e tij në zhvillimin e AI.
Hinton u punësua nga Google 10 vjet më parë për t’i ndihmuar ata të zhvillonin inteligjencën artificiale, ku pikërisht kërkimi i tij çoi në krijimin e sistemeve si ChatGPT.
Hinton gjithashtu pranoi për BBC se mosha e tij gjithashtu luajti një rol në vendimin e tij për t’u larguar nga Google:
“Unë jam 75 vjeç, është koha për të dalë në pension”.
Ai i tha New York Times se besonte se Google ishte një “kujdestar i duhur” i teknologjisë, por kjo ndryshoi kur Microsoft filloi të ndërtonte një chatbot në motorin e tij të kërkimit Bing dhe kompania filloi të shqetësohej për rreziqet e kërkimeve në internet.
Ai tha se disa nga rreziqet e chatbot-eve ishin “mjaft të frikshme”, duke paralajmëruar se ata mund të bëhen më inteligjentë se njerëzit dhe mund të shfrytëzohen nga “aktorët e këqij”.
“Tani po flasim për skenarin më të keq të mundshëm, atë nga makthi. Mund të imagjinoni, për shembull, një aktor të keq si Vladimir Putin që vendosi t’u japë robotëve fuqinë për të krijuar nën-qëllimet e tyre,” tha ai, duke paralajmëruar se kjo mund të çojë përfundimisht në abuzimin e inteligjencës artificiale për të fituar më shumë pushtet. /tesheshi.com/
