Pas përzgjedhjes së 15 emrave për SPAK-un, Kreu i Këshillit të Lartë të Prokurorisë Gent Ibrahimi, tha se tashmë të nominuarit duhet të kalojnë vettingun.
“Ne përfunduam listën e kandidatëve për SPAK dhe tani jemi të gatshëm t’i emërojmë ata sapo ata t’i kenë kaluar dy shkallët e vetting-ut. Të shohim si do të ecin kandidatët të renditur nga ne në listën fituese. Kur një numër i arsyeshëm të ketë kaluar të dyja shkallët, ne mblidhemi dhe shpallim të ngritur SPAK. Vlerësimi ynë kishte të bënte me aspektin profesional të prokurorëve, integritetin e vlerëson vetting-u. Hipoteza që dikush mund të mos e kalojë vetting-un është e mundshme”, tha ai në një prononcim për TCH.
Sipas tij, mundet që SPAK të merr formë përfundimtare në tetor, që përkon dhe me afatin e hapjes së negociatave.
“Në këtë moment nuk është në dorën tonë caktimi i një kalendari, është në dorën e institucionve të vetting-ut. E mira është të përkojë me kalendarin e integrimit që kërkon që deri në mes të tetorit t’i kemi institucionet e ngritura”, tha Ibrahimi. /tesheshi.com/
