Deputeti gjerman dhe kreu i Komisionit për Çështjet Europiane në Bundestag, Gunther Krichbaum, në një intervistë për Deutsche Welle deklaron se Shqipëria është ende shumë larg nga fillimi i bisedimeve për anëtarësim në BE.
Në intervistën e dhënë pas pritjes në Berlin të kreut të opozitës, Lulzim Basha, Krichbaum, foli për temat e bisedës që është përqëndruar tek fluksi i refugjatëve por edhe për ndihmën që CDU po i jep PD-së.
Pasi rendit prioritetet e Shqipërisë, e cila duhet të ketë rezultate në frenimin e fluksit të azilkërkuesve, reformën në Drejtësi dhe dekriminalizimin, Krichbaum deklaroi se ka ende shumë rrugë për të përshkruar deri në nisjen e bisedimeve.
“Ne në Komisionin e Bundestagut për Europën do të ndjekim me shumë vëmendje se çfarë përparimesh janë bërë në drejtim të dekriminalizimit të politikës, reformës në drejtësi, luftimit të korrupsionit dhe sigurimin e zgjedhjeve të lira dhe të ndershme. Por aktualisht Shqipëria, jo vetëm për shkak të parregullsive në zgjedhjet e fundit vendore, ndodhet ende shumë larg fillimit të bisedimeve të anëtarësimit për në BE”, tha ai.
Gjithashtu, sipas tij, është një kusht i panegociueshëm për fillimin e bisedimeve të anëtarësimit që politika shqiptare të dekriminalizohet.
Krichbaum e sheh pozitivisht edhe hetimin ndërkombëtar për skandalin e CEZ. “Duke pasur parasysh situatën e ndezur politike në Shqipëri, unë e shoh si një propozim shumë të mirë pjesëmarrjen e hetuesve ndërkombëtare për zbardhjen e kësaj afere. Kjo sigurisht do të rriste besueshmërinë dhe pranueshmërinë e rezultateve të hetimit”, përfundoi ai. /tesheshi.com/
