Komisioni parlamentar i Sigurisë Kombëtare thirri sot për të raportuar kreun e Shërbimit Informativ Shtetëror, Visho Ajazi Lika, lidhur me pajisjen e përgjimit. Kreu i SHISH deklaroi në fjalën e tij krejt të kundërtën e asaj që ka thënë më herët ministri i Brendshëm, Saimir Tahiri, i cili përherë është shprehur se në Shqipëri nuk ka një pajisje të tillë përgjimi.
Visho Ajazi Lika bëri të ditur se një pajisje e sigurisë së lartë kishte ardhur në Shqipëri dy muaj më parë dhe ishte vendosur në Vlorë për trajnim, por se ai nuk e ka parë.
“Këto janë pajisje që njihen dhe gjenden edhe në internet. Problemi ishte se nuk ishte deklaruar si e hyrë. I shqetësuar se një pajisje e tillë mund të përdoret në mënyrë jo të ligjshme, kontaktova Prokurorin e Përgjithshëm dhe i raportova, duke i thënë se nuk kemi më shumë informacion. E theksoj ‘mund’ të cenonte sigurinë kombëtare. Dinim vetëm që kishte hyrë në Shqipëri, ishte në ambient trajnimi, në Vlorë, ku përdorej nga policia italiane në trajnim me atë shqiptare. SHISH nuk ka asnjë informacion kush dhe pse është përgjuar”, u shpreh kreu i SHISH.
Ai tha se kjo është ajo që di dhe se të tjerat janë në dijeninë dhe tagrin e Prokurorisë. /tesheshi.com/
